«GULFOOD». Аз Тоҷикистон дар ин намоишгоҳи байналмилалии ғизо ва нӯшокиҳо 11 корхонаи коркарди меваи хушк иштирок дорад

ДУШАНБЕ, 18.02.2025 /АМИТ «Ховар»/. Дар гӯшаи махсуси Тоҷикистон дар Намоишгоҳи байналмилалии «Gulfood» намояндагони 11 корхонаи коркарди хушкмеваи ҷумҳурии мо маҳсулоти худро ба намоиш гузоштанд. Иштирок дар ин намоишгоҳ барои корхонаҳои ватанӣ имкон фароҳам меорад, то маҳсулот ва имконияти худро муаррифӣ ва тарғиб намоянд, ҳамкории эҳтимолии тиҷоратиро баррасӣ карда, бо раванд ва тамоюлоти нави бозор дар минтақа шинос шаванд, хабар медиҳад АМИТ «Ховар» бо истинод ба Палатаи савдо ва саноати Тоҷикистон.

Ба иттилои манбаъ, шуруъ аз 17 феврал дар шаҳри Дубай Намоишгоҳи байналмилалии ғизо ва нӯшокиҳои «Gulfood 2025» оғоз гардида, то 21 феврал идома меёбад. Дар намоишгоҳ беш аз 5500 ширкат аз 130 кишвари ҷаҳон иштирок дошта, шумораи меҳмонон дар он ҳудуди 100 ҳазор нафарро дар бар мегирад. Маҳсулоти пешниҳоднамудаи корхонаҳои коркарди хушкмеваҳои Тоҷикистон — «Водии меваҳо», «Оро Исфара», «Исфара Фуд», «Меваи тиллоӣ», «Меваи заррин», «Висол» ва «Тути Помир» писанди иштирокдорон ва меҳмонони намоишгоҳ гардид.

Намоишгоҳи «Gulfood Dubai» ҳар сол баргузор шуда, яке аз намоишгоҳҳои бузургтарини тиҷоратӣ дар саноати хӯрокворӣ мебошад. Он иштирокдорон, коршиносони пешсафи соҳа ва харидоронро аз саросари ҷаҳон барои табодули идеяҳо, тавсеаи равобити тиҷоратӣ ва барқарор намудани ҳамкории стратегӣ гирди ҳам меорад.

Дар ин намоишгоҳ ширкатҳои Тоҷикистон ҳамчунин дар мизҳои мудаввар, машварату ҳамоишҳои тиҷоратӣ иштирок карда, доир ба равандҳои нави соҳа маълумот мегиранд. Онҳо доир ба талаботи бозор ва муштариён маълумоти муфид пайдо менамоянд, ки ин барои рақобатпазирӣ дар бозор ва ҷустуҷӯи самтҳои нави рушд ёрӣ мерасонад.

АКС: Палатаи савдо ва саноати Ҷумҳурии Тоҷикистон