Мулоқоти муовини якуми Сарвазири Ҷумҳурии Тоҷикистон бо ҳайати Фонди саудии рушд

ДУШАНБЕ, 13.02.2025 /АМИТ «Ховар»/. Муовини якуми Сарвазири Ҷумҳурии Тоҷикистон Ҳоким Холиқзода бо Директори минтақавии Фонди Саудии Рушд дар Осиёии Марказӣ Муҳаммад Ал-Масъуд  мулоқот намуд.

Дар мулоқот масъалаҳои вобаста ба тавсеаи робитаҳои иқтисодию тиҷоратӣ ва молиявию сармоягузории Ҷумҳурии Тоҷикистон ва Подшоҳии Арабистони Саудӣ, аз ҷумла ҳамкорӣ бо Фонди Саудии  Рушд мавриди баррасӣ қарор дода шуд.

Тавре таъкид гардид, то имрӯз аз ҷониби Фонди Саудии Рушд 306 миллион доллари амрикоӣ маблағҳои қарзи имтиёзнок ба  Ҷумҳурии Тоҷикистон ҷудо шудааст. Ҳоло 4 лоиҳаи дигар ба маблағи умумии 180 миллион доллар мавриди амал қарор дорад.

Илова бар ин, лоиҳаи  созишномаи қарзӣ дар ҳаҷми 30 миллион доллари амрикоӣ барои татбиқи лоиҳаи «Сохтмони роҳи ҳалқавии шаҳри Кӯлоб» баррасӣ шуд.

Таъкид гардид, ки ин лоиҳа аҳамияти байналмилӣ дошта, пойтахти мамлакат ва дигар минтақаҳои ҷумҳуриро бо Вилояти Мухтори Куҳистони Бадахшон ва минбаъд бо Ҷумҳурии Мардумии Чин, Афғонистон, Покистон ва дигар кишварҳои минтақа мепайвандад.

Муовини якуми Сарвазири мамлакат даъват намуд, ки  фонди мазкур барои лоиҳаҳои афзалиятноки Тоҷикистон, аз ҷумла афзоиши истеҳсоли «неруи сабз» маблағгузориро бештар намояд.

Инчунин зиёд намудани ҳаҷми маблағҳо барои татбиқи лоиҳаҳои муҳими инфрасохтории Тоҷикистон, аз ҷумла дар соҳаҳои маориф, тандурустӣ ва нақлиёт зарур шумурда шуд.

Дар фарҷоми мулоқот изҳори итминон карда шуд, ки дар доираи ҳамкории судманд ҷиҳати рушду тавсеаи муносибатҳо дигар имкониятҳои мавҷуда низ истифода хоҳад шуд.

АКС: АМИТ «Ховар»