НИШАСТИ МАТБУОТӢ. Барои муштариёне, ки ба низоми биллингӣ пайваст гардидаанд, маркази тамос ташкил шудааст

Февраль 11, 2025 13:40

ДУШАНБЕ, 11.02.2025. /АМИТ «Ховар»/. Аз соли 2021 дар шаҳри Душанбе лоиҳаи «Низоми автоматикунонидашудаи назорат ва баҳисобгирии неруи барқ» оид ба системаи нав – низоми биллингӣ  амал менамояд. Аммо сокинони пойтахт аз он изҳори нигаронӣ менамоянд, ки вобаста ба ҳалли мушкилоти ин низом ва пайдо кардани намояндаи он намедонанд ба куҷо муроҷиат кунанд.

Ба саволи хабарнигори АМИТ «Ховар», ки дар ин маврид ба мушкилоти сокинон кӣ бояд сари вақт ҷавоб гардонад, имрӯз зимни нишасти матбуотӣ намояндаи Ҷамъияти саҳомии кушодаи «Шабакаи тақсимоти барқ» Муҳаммад Ғуломзода чунин посух гардонид: «Вобаста ба ҳалли мушкилоти сокинони пойтахт аз ҷониби Ҷамъияти  саҳомии кушодаи «Шабакаи тақсимоти барқ дар шаҳри Душанбе» барои муштариёне, ки ба низоми биллингӣ  пайваст  гардидаанд, маркази тамос ташкил гардидааст. Дар он 16 нафар бо кор таъмин гардида, инчунин барои сари вақт ҳал намудани мушкилоти сокинон навбатдории шабона ташкил шудааст. Рақами маркази тамос барои сокинони ноҳияи Синои шаҳри Душанбе 44 6506600 ва барои сокинони ноҳияҳои Фирдавсӣ, Шоҳмансур ва Исмоили Сомонии  пойтахт 44 610 1818 мебошад. Сокинон метавонанд ба ин рақамҳо дар тамос шаванд».

Муҳаммад Ғуломзода иброз намуд, ки дар даромадгоҳи биноҳои баландошёнаи истиқоматӣ варақаҳои иттилоотӣ насб гардидаанд, ки шаҳрвандон метавонанд тавассути онҳо муроҷиат намоянд.

«Дар ноҳияи Синои шаҳри Душанбе то имрӯз беш аз 140 ҳазор ҳисобкунаки барқӣ ба низоми биллингӣ васл гардидааст. Инчунин дар ноҳияҳои Шоҳмансур, Фирдавсӣ ва Исмоили Сомонӣ зиёда аз 90 ҳазор ҳисобкунаки барқӣ насб гардидааст, ки 75 ҳазор адади он ба низоми биллингӣ васл шудааст», — гуфт Муҳаммад Ғуломзода.

Ҳадафи асосии лоиҳа кам кардани талафоти неруи барқ ва зиёд намудани сатҳи пардохти ҳаққи истифодаи қувваи барқ мебошад. Тибқи нақшаи лоиҳа, кам кардани талафоти тиҷоратию технологии қувваи барқ аз 19 фоизи расмӣ то 12,6 дарсад дар назар дошта шуда буд. Афзалияти асосии гузариш ба ин самт аз он иборат аст, ки кор бо роҳи автоматӣ амалӣ шуда, омилҳои инсонӣ аз байн мераванд. Инсон дар ин раванд дигар нақш намебозад. Кор дар низоми биллингӣ чунин аст, ки охири ҳар моҳ маълумот доир ба ҳаҷми истифодашудаи қувваи барқ  ва маблағи он ба воситаи рақами телефони муштарӣ бо паёмак ирсол мегардад. Баъд аз санаи ҳисобишуда ба муштарӣ то 15 моҳи оянда муҳлат дода мешавад, то маблағи ҳаққи истифодаи қувваи барқро ба тариқи ғайринақдӣ супорад, вагарна баъд аз ин муҳлат интиқоли қувваи барқ ба таври автоматӣ қатъ мегардад.

Фирӯза ДАВЛАТЗОДА,
АМИТ «Ховар»

АКС: АМИТ «Ховар»  

Февраль 11, 2025 13:40

Хабарҳои дигари ин бахш

Масъалаҳои баргузории Форуми B5+1 дар Душанбе баррасӣ шуданд
Тоҷикистон ба Конвенсияи СММ оид ба мубориза бо биёбоншавӣ пешниҳод намуд, ки соли 2027 миссияи техникӣ ташкил карда шавад
Бо сабаби фаъолият накардани корхонаи «Хишти Тоҷикобод» сокинон ин масолеҳи сохтмониро аз Душанбе ва Ваҳдат бо роҳкирои гарон ворид менамоянд
Дар Минтақаи озоди иқтисодии «Ишкошим» ба маблағи беш аз 1 миллион сомонӣ кору хизматрасонӣ анҷом дода шуд
Дар доираи ҷаласаи 45-уми пленарии ГАО ҳамоиш баргузор гардид
Тоҷикистон барои мубориза бо тағйирёбии иқлим ва ҳифзи пиряхҳо иқдомҳои мушаххасро тақвият мебахшад
Душанбе мизбони конференсияи миллӣ ва Намоишгоҳи технологияҳои рақамӣ дар соҳаи кишоварзӣ мегардад
Тоҷикистон ва Озарбойҷон ҳамкориро дар соҳаи ҳифзи муҳити зист тақвият медиҳанд
Дар Душанбе ҷаласаи 45-уми пленарии ГАО оғоз шуд
Раванди татбиқи низоми электронии сертификатсияи фитосанитарӣ дар Тоҷикистон баррасӣ гардид
Ҳамкории Палатаи ҳисоби Тоҷикистон ва Додгоҳи ҳисоби Туркия густариш меёбад
«ПАРДОХТИ ЯГОНАИ КОММУНАЛӢ». Низоми нав пардохтро барои сокинон осонтар, равшантар ва шаффофтар мегардонад