НИШАСТИ МАТБУОТӢ. Қисми даромади буҷети ҷумҳуриявӣ соли 2024 дар сатҳи 109,6 фоиз таъмин шуд

ДУШАНБЕ, 14.02.2025 /АМИТ «Ховар»/. Соли 2024 нақшаи қисми даромади буҷети ҷумҳуриявӣ дар сатҳи 109,6 фоиз таъмин шуда, ба буҷет 22 миллиарду 700 миллион сомонӣ ворид гардид. Дар ин хусус имрӯз зимни нишасти матбуотӣ Вазири молияи Ҷумҳурии Тоҷикистон Файзиддин Қаҳҳорзода иттилоъ дод.

Ҳамзамон иҷрои нақшаи қисми даромади буҷетҳои маҳаллӣ дар сатҳи 106,4 фоиз таъмин гардида, ҳаҷми умумии воридоти маблағҳо 10 миллиарду 400 миллион  сомониро ташкил дод.

Хароҷоти буҷети давлатӣ дар моҳҳои январ-декабри соли 2024 дар доираи нақшаи пешбинигардида ва даромадҳои воқеии буҷет амалӣ карда шуда, ба соҳаҳои иқтисодии ҷумҳурӣ 45 миллиарду 500 миллион сомонӣ равона гардид.

Аз ҷумла, ба соҳаҳои мақомоти ҳокимият ва идоракунии давлатӣ 2,4 миллиард сомонӣ, маориф 8,8 миллиард сомонӣ, тандурустӣ 3,7 миллиард сомонӣ, ҳифзи иҷтимоӣ 6 миллиард сомонӣ, фарҳангу варзиш 2,5 миллиард сомонӣ, хоҷагии манзилию коммуналӣ 2,5 миллиард сомонӣ, комплекси сӯзишворию энергетикӣ 7,1 миллиард сомонӣ, кишоварзӣ 1,1 миллиард сомонӣ, саноат ва сохтмон 354,6 миллион сомонӣ ва нақлиёт ва коммуникатсия 3 миллиард сомонӣ равона карда шуд.

АКС: АМИТ «Ховар»