НИШАСТИ МАТБУОТӢ. Мақомоти гумрук ба буҷети давлатӣ беш аз 9,7 миллиард сомонӣ пардохтҳои гумрукӣ ворид намуд

ДУШАНБЕ, 12.02.2025 /АМИТ «Ховар»/. Хадамоти гумруки Тоҷикистон аз барзиёд иҷро гардидани нақшаи пардохтҳои гумрукӣ дар соли 2024 иттилоъ медиҳад.

Сардори Хадамоти гумруки назди Ҳукумати Ҷумҳурии Тоҷикистон Хуршед Каримзода 12 феврал дар нишасти матбуотӣ зимни натиҷагирӣ аз фаъолияти мақомоти гумруки мамлакат дар соли 2024 иттилоъ дод, ки соли 2024 ба буҷети давлатӣ беш аз 9,7 миллиард сомонӣ пардохтҳои гумрукӣ ворид шуданд. Ин нисбат ба нақшаи тасдиқгардида беш аз 1,3 миллион сомонӣ ё 115 фоиз ва нисбат ба нақшаи аниқшуда зиёда аз 617 миллион сомонӣ ё беш аз 106 фоиз зиёд мебошад.

Нақшаи пардохтҳои гумрукӣ соли 2024 ба маблағи 8 миллиарду 434 миллион сомонӣ пешбинӣ гардида буд, вале баъдан бо назардошти ворид намудани иловаҳо нақшаи аниқшуда 9 миллиарду 134 миллион сомониро ташкил дод.

Хуршед Каримзода гуфт, ки иҷрои нақша аз рӯи намуди пардохтҳои гумрукӣ аз ҳисоби андоз аз арзиши иловашуда /ААИ/ дар сатҳи беш аз 107 фоиз ё 528 миллион сомонӣ зиёд, боҷи гумрукӣ 102,7 фоиз ё 33,8 миллион сомонӣ зиёд, боҷи содиротӣ 107,4 фоиз ё 13 миллион сомонӣ, андози аксизӣ 103 фоиз ё 24,5 миллион сомонӣ ва воридоти ғайриандозӣ беш аз 149 фоиз ё дар ҳаҷми 70,1 миллион сомонӣ зиёд таъмин карда шуд.

Ба андешаи Сардори Хадамоти гумруки назди Ҳукумати Ҷумҳурии Тоҷикистон, новобаста аз идома ёфтани буҳрони молиявӣ-иқтисодӣ дар робита ба ногувор шудани авзои сиёсии минтақа ва ҷаҳон, ки боиси ба миён омадани душвориҳои зиёд ҳангоми интиқоли борҳо байни шарикони тиҷорати хориҷии ҷумҳурӣ гардид, Хадамоти гумрук тавонист иҷрои нақшаи пардохтҳои гумрукиро барзиёд таъмин намояд.

Хуршед Каримзода омилҳои асосии барзиёд иҷро гардидани нақшаи пардохтҳои гумрукиро дар маҷмуъ ба амалӣ намудани дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон оид ба рақамикунонии соҳа ва дар ин раванд такмил додани низоми маъмурикунонии гумрукӣ рабт дод.

Инчунин гуфта шуд, ки қабулу татбиқи амалии «Барномаи миёнамуҳлати рушди мақомоти гумруки Ҷумҳурии Тоҷикистон барои солҳои 2020 – 2024» ва Нақшаи чорабиниҳо оид ба амалисозии он дар ин самт нақши муассир дорад.

Амалисозии чорабиниҳо оид ба татбиқи барнома ҳама самтҳои фаъолият, аз ҷумла такмил додани қонунгузорӣ, маъмурикунонии гумрукӣ, рушди низоми идораи таваккал, иҷрои вазифаҳои фискалӣ, риояи мамнуияту маҳдудият, самти ҳифзи ҳуқуқӣ, таъминоти ҳуқуқӣ, рушди технологияи иттилоотӣ-коммуникатсионӣ, ҳамкории байналмилалӣ, кор бо кадрҳо, экспертиза ва таҳқиқот, такмил додани инфрасохтор, ҳамкории байниидоравӣ ва рушди низоми пешниҳоди хизмати давлатиро ба танзим даровард.

Татбиқи Низоми «Равзанаи ягонаи барасмиятдарории амалиёти содиротӣ, воридотӣ ва транзитӣ», ки боиси гузариш аз шакли коғазӣ ба электронии пешниҳоди ҳуҷҷатҳои расмии 11 мақомоти ба низом дохилшуда гардид, ба сода ва шаффоф намудани расмиёти савдои хориҷӣ ва хизматрасонии давлатӣ мусоидат намуд.

Марзия САИДЗОДА,
АМИТ «Ховар»

АКС: АМИТ «Ховар»