Сафири Тоҷикистон дар Беларус дар ҳамоиши адабӣ бахшида ба Рӯзи байналмилалии забони модарӣ иштирок намуд

ДУШАНБЕ, 22.02.2025. /АМИТ «Ховар»/. 21 феврал Сафири Фавқулода ва Мухтори Ҷумҳурии Тоҷикистон дар Ҷумҳурии Беларус Бахтовар Сафарзода ҳамоиши адабӣ таҳти унвони «Симои шоиронаи Ватан», ки дар доираи таҷлили Рӯзи байналмилалии забони модарӣ дар Ҷумҳурии Беларус баргузор гардид, иштирок намуд. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Беларус иттилоъ медиҳад.

Бахтовар Сафарзода зимни суханронӣ изҳор намуд, ки ҳифзи забони модарӣ яке аз унсурҳои муҳими ҳувияти миллӣ мебошад. Дар Тоҷикистон таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон ба рушди забони миллӣ дар мақоми давлатӣ диққати аввалиндараҷа дода мешавад.

Ҳамчунин иброз гардид, ки Тоҷикистон ва Беларусро на танҳо муносибатҳои зичи иқтисодӣ ва сиёсӣ, балки муҳаббати муштарак ба фарҳанг, адабиёт ва санъат пайваст менамоянд. Чунин чорабиниҳо, ба монанди шабҳои адабӣ дар таҳкими робитаҳои фарҳангӣ байни миллатҳо нақши муҳим мебозанд. Намунаи равшани чунин ҳамкорӣ ба табъ расидани китоби «Дӯстии халқҳо — дӯстии адабиёт» бо шарофати адибони шинохтаи Тоҷикистон ва Беларус Ато Ҳамдам ва Алес Карлюкевич дар соли 2011 дар шаҳри Душанбе мебошад.

Дар Беларус инчунин маҷмуаи ҳикояву достонҳои Ато Ҳамдам ба забони беларусӣ «Жыццё не спыняецца», китоби муаллифони муосири Тоҷикистон ба забони беларусӣ «Дар зери ситораи Рӯдакӣ», шеърҳои Саидалӣ Маъмур, Фарзона ва ғайра, дар Душанбе — китобҳои Алес Бадак, Георгий Марчук, Юрий Сапожков, Николай Метлицкий ва Алексей Дударев ба нашр расиданд.

АКС: Сафорати Ҷумҳурии Тоҷикистон дар Ҷумҳурии Беларус