Баҳорро бо пойгоҳҳои нави базавӣ пешвоз мегирем!

ДУШАНБЕ, 20.03.2025 /АМИТ «Ховар»/. То аввали моҳи март ширкати «МегаФон Тоҷикистон» дар тамоми манотиқи ҷумҳурӣ 60 майдони  нави пойгоҳҳои  базавӣ ба кор даровард. Соли равон шумораи умумии пойгоҳҳои нави базавии 4G/LTE, ки дар ин майдонҳо  насб шудаанд ва дар диапазонҳои басомади гуногун кор мекунанд, аз 100 адад гузашт. Сохтмони фаъолонаи шабакаи насли чорум барои дастгирии ташаббусҳои ҳукумат дар самти  рушди иқтисодиёти рақамӣ ва инноватсияҳо  идома дорад.  

Дар оғози соли 2025 ширкат шумораи бештари пойгоҳҳои  нави базавии  4G-ро дар вилояти Хатлон ба кор даровард.  Дар ин ҷо шабакаи «МегаФон Тоҷикистон» бо зиёда аз 20 пойгоҳи базавӣ дар шаҳрҳои Бохтар, Кӯлоб, Левакант, Норак,  Данғара ва ноҳияҳои  Ҷалолидини Балхӣ, Восеъ, Ҷайҳун, Абдураҳмони Ҷомӣ, Қубодиён, Кушониён, Фархор, Хуросон ва Ёвон васеъ карда шуд.

Дар ҷои дуюм вилояти Суғд қарор дорад, ки дар ноҳияҳои Бобоҷон Ғафуров, Деваштич, Зафаробод, Истаравшан, Исфара, Кӯҳистони Мастчоҳ  ва Спитамен 14 майдони пойгоҳи базавӣ фаъол гардид.

Илова бар ин, дар шаҳри Душанбе, шаҳру ноҳияҳои  Ваҳдат, Ҳисор, Варзоб, Турсунзода, Файзобод, Шаҳринав ва дар якчанд  ноҳияҳои Вилояти Мухтори Кӯҳистони Бадахшон, аз ҷумла  Ванҷ,   Дарвоз, Мурғоб ва Рӯшон шабакаи «МегаФон Тоҷикистон» тақвият дода шудааст. Ҳамгироии  пойгоҳҳои нави базавӣ суръати интернети мобилиро баланд бардошта, барои дастрасии хизматрасониҳои муосири рақамӣ барои сокинони минтақаҳои Тоҷикистон таъсири мусбат мерасонад.

«Солҳои 2025-2030 дар мамлакат Солҳои рушди  иқтисоди рақамӣ ва инноватсия эълон гардиданд. Бо мақсади вусъат  бахшидан  ва пайваста васеъ намудани digital-сервисҳо  мо аз рӯзҳои аввали моҳи январ  фаъолона  пойгоҳҳои базавиро  дар  шаҳру ноҳияҳои ҷумҳурӣ ба кор медарорем. Ҳамаи ин  тасмимҳо ба қонеъгардонии талаботи замон ва интизориҳои  муштариёни мо  равона  гардидааст», – мегӯяд Директори генералии ширкати «МегаФон Тоҷикистон» Анатолий Изюмников.

АКС: ширкати «МегаФон Тоҷикистон»