Дар гармхонаи шаҳри Хоруғ зиёда аз 10 ҳазор кӯчати гул парвариш мешавад

ДУШАНБЕ, 10.03.2025. /АМИТ «Ховар»/. Дар шаҳри Хоруғ гармхонаи муосир бунёд гардидааст, ки дар он зиёда аз 10 ҳазор кӯчати гул бо фарогирии 4 намуди гули патунӣ, 2 намуди гули салваи сафед ва сурх, гули лола ва 1,5 ҳазор бех садбаргҳои ороишӣ парвариш карда мешаванд.

Тавре аз Мақомоти иҷроияи ҳокимияти давлатии шаҳри Хоруғ ба АМИТ «Ховар» иттилоъ доданд, гармхона дар ҳамкорӣ бо Институти биологии Помир ва Сарраёсати ҳифзи муҳити зисти вилоят бунёд гардидааст.

Гулҳои ороишӣ барои сабзазоркунии гулгашту хиёбонҳо, кӯчаҳо, мавзеъҳои назди бинои идораю муассисаҳо парвариш карда мешаванд.

Дар гармхона гулкорон 2 намуди хок, доруҳои махсус барои сабзиши тухмиҳои гулҳои яксола ва пору истифода мебаранд, ки ин ба хубтар нашъунамо ёфтани гулҳо мусоидат менамояд.

АКС: Мақомоти иҷроияи ҳокимияти давлатии шаҳри Хоруғ