Дар вилояти Суғд майдони боғоти мевадиҳанда васеъ мегардад

ДУШАНБЕ, 11.03.2025. /АМИТ «Ховар»/. Дар вилояти Суғд аз ҷониби Ҷамъияти дорои масъулияти маҳдуди «Фортуна ва компания»  масоҳати боғоти мевадиҳанда ба  34 гектар расонида мешавад. Дар ин хусус ба АМИТ «Ховар» аз хадамоти матбуоти Раиси вилояти Суғд иттилоъ доданд.

Тибқи маълумоти масъулин, дар 6 гектар зардолуи навъи Присия шинонида мешавад, ки аз ҳар гектар беш аз 400-сентнерӣ ҳосил ба даст овардан мумкин аст.

То имрӯз дар 24 гектар боғи зардолу, шафтолу, нок ва бодом бунёд шуда, дарахтон бо риояи қоидаҳои агротехникӣ нашъу намои хуб доранд. Меваҳои ин боғ асосан ба содирот нигаронида шуда, бо ҳосилнокии баландашон фарқ менамоянд.

Ҷамъияти дорои масъулияти маҳдуди «Фортуна ва компания»  нақша дорад, ки бо истифода аз дастгирии давлатӣ майдони боғотро боз ҳам васеъ намуда, таҷрибаҳои пешрафтаи ватанӣ ва хориҷиро ба таври васеъ амалӣ намояд.

АКС: Хадамоти матбуоти Раиси вилояти Суғд