Гурӯҳи тарғиботӣ бо сокинони маҳаллаи Ҷавонони деҳоти Чилгазии Исфара вохӯрӣ намуд

ДУШАНБЕ, 30.03.2025 /АМИТ «Ховар»/. Тибқи нақшаи Мақомоти иҷроияи ҳокимияти давлатии шаҳри Исфара, 27 март гурӯҳи тарғиботӣ бо сокинони маҳаллаи Ҷавонони деҳоти Чилгазӣ мулоқот намуд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Исфара хабар медиҳад, аъзои гурӯҳи тарғиботӣ муҳтавои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ»-ро ба мардум фаҳмониданд.

Инчунин масъулин вобаста ба пешгирии ҳамроҳшавии ҷавонон ба гурӯҳҳои ифротгароӣ ва таълимоти ғайрирасмии динӣ, ҷалби ҷавонписарон ба сафи Қувваҳои Мусаллаҳи Ҷумҳурии Тоҷикистон, баланд бардоштани маърифати ҳуқуқии шаҳрвандон, ба касбомӯзӣ фаро гирифтани занону духтарони хонанишин, тозаву озода нигоҳ доштани маҳалли зист, самаранок истифода бурдани қувваи барқ ва заминҳои хоҷагиҳои деҳқонӣ ва наздиҳавлигӣ, иҷрои қонунҳои Ҷумҳурии Тоҷикистон «Дар бораи масъулият барои таълиму тарбияи кӯдак» ва «Дар бораи танзими ҷашну маросим дар Ҷумҳурии Тоҷикистон» сухан намуданд.

АКС: Мақомоти иҷроияи ҳокимияти давлатии шаҳри Исфара