Хатти интиқоли барқи 500 кВ байни Тоҷикистон ва Қирғизистон ба истифода дода мешавад

ДУШАНБЕ, 15.03.2025 /АМИТ «Ховар»/. Дар ояндаи наздик хатти интиқоли барқи 500 кВ байни Ҷумҳурии Тоҷикистон ва Ҷумҳурии Қирғизистон, аз зеристгоҳи барқии «Суғд-500» то зеристгоҳи барқии «Датка» ба истифода дода мешавад. Дар ин хусус дар мулоқоти муовини Вазири энергетика ва захираҳои оби Ҷумҳурии Тоҷикистон Манучеҳр Сафарзода бо муовини Вазири энергетикаи Ҷумҳурии Қирғизистон Назгул Усенова иттилоъ дода шуд.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон хабар медиҳад, ки дар мулоқот ҳамкории дуҷониба дар соҳаи энергетика, аз ҷумла дар доираи Лоиҳаи минтақавии интиқоли неруи барқи «CASA-1000» мавриди баррасӣ қарор гирифт.

Мусоҳибон изҳори итминон намуданд, ки ҳамкории мутақобилан судманд дар соҳаи энергетика байни ду давлати ҳамсоя дар оянда низ густариш ёфта, ба сатҳи сифатан нав бароварда мешавад.

АКС: Вазорати энергетика ва захираҳои оби Ҷумҳурии Тоҷикистон