Нишасти коршиносон оид ба таҳияи лоиҳаи Стратегияи рақамикунонии долонҳои нақлиётии мултимодалии кишварҳои ИДМ доир мешавад

Март 18, 2025 10:11

ДУШАНБЕ, 18.03.2025 /АМИТ «Ховар»/. Вазорати нақлиёти Тоҷикистон нахустин нишасти коршиносонро оид ба таҳияи лоиҳаи Стратегияи рақамикунонии долонҳои нақлиётии мултимодалии кишварҳои аъзои Иттиҳоди Давлатҳои Мустақил ба нақша гирифтааст, иттилоъ медиҳад АМИТ «Ховар» бо истинод ба ин вазорат.

Нишасти коршиносони соҳавӣ дар ҳошияи Форуми байналмилалии операторони «бандарҳои хушк», хизматрасонии нақлиётии логистикӣ ва мултимодалӣ, ки аз ҷониби Комиссияи иқтисодӣ ва иҷтимоии Созмони Милали Муттаҳид барои кишварҳои Осиё ва Уқёнуси Ором (ЭСКАТО СММ) 26-27 марти соли 2025 дар Бангкок доир мегардад, баргузор мешавад.

Дар оянда афзоиши талабот ба боркашонии байналмилалӣ дар назар дошта шудааст. Дар робита ба ин, инфрасохтори устувори нақлиёти рақамӣ барои ноил шудан ба Ҳадафҳои рушди устувор аҳамияти ҳаётан муҳим хоҳад дошт. Тибқи пешгӯиҳо, то соли 2050 талаботи ҷаҳонӣ ба боркашонӣ тақрибан 100 фоиз ва ба мусофиркашонӣ 79 фоиз афзоиш меёбад. Андешидани тадбирҳо дар ин самт муҳим арзёбӣ мегардад.

Ҳукумати Тоҷикистон қаблан ташаббуси бунёди долони нақлиётии мултимодалиро, ки Чин, Тоҷикистон, Узбекистон, Туркманистон, Эрон, Туркия ва Аврупоро бо ҳам мепайвандад, ба миён гузошта буд. Соли 2023 Президенти Ҷумҳурии Тоҷикистон муҳтарам Эмомалӣ Раҳмон дар саммити Созмони ҳамкории иқтисодӣ (СҲИ) дар Тошканд изҳор доштанд, ки ҳарчи зудтар бунёд гардидани долони нақлиётӣ аз Чин то Туркия ва Аврупо тавассути кишварҳои аъзои Осиёи Марказӣ ба афзоиши гардиши бор байни давлатҳо мусоидат менамояд.

Моҳи майи соли 2024 зимни суханронӣ дар ҳамоиши «Рушди долонҳои мултимодалии байналмилалии нақлиётӣ, ки аз кишварҳои Осиё ва Ховари Миёна мегузаранд», ки дар доираи Форуми XV байналмилалии иқтисодии «Русия – ҷаҳони Ислом: KazanForum» дар Қазон баргузор гардид, Вазири нақлиёти Тоҷикистон Азим Иброҳим иброз дошт, ки «корҳо барои истифодаи самараноки долони нақлиётии «Тоҷикистон – Узбекистон – Туркманистон – Эрон–Туркия» идома дорад. Он яке аз масирҳои кӯтоҳтарин аз Чин тавассути ҳудуди Тоҷикистон ва ин кишварҳо буда, ба ҳамгироии иқтисодии минтақавӣ мусоидат менамояд».

Инчунин даҳ долони афзалиятноки тиҷоратию нақлиётӣ муайян карда шудааст, ки аз шарқ ба ғарб ва аз шимол ба ҷануб аз ҳудуди Тоҷикистон мегузаранд. Ба рушди хатсайрҳои умумии иқтисодӣ ва нақлиётии Тоҷикистон, ки кишварҳои Осиёи Ҷанубу Шарқиро бо Осиёи Марказӣ, Русия, Эрон, Туркия ва давлатҳои Аврупо мепайванданд ва дастрасӣ ба бандарҳои баҳриро таъмин менамоянд, таваҷҷуҳи махсус дода мешавад.

АКС: Вазорати нақлиёти Тоҷикистон

Март 18, 2025 10:11

Хабарҳои дигари ин бахш

Сарвазири Тоҷикистон бо президенти Федератсияи палатаҳои тиҷоратии Арабистони Саудӣ мулоқот намуд
Ҳайати Тоҷикистон дар ҷаласаи солонаи Гурӯҳи Бонки исломии рушд иштирок дорад
Дар роҳҳои мошингарди Тоҷикистон ҳаракати воситаҳои нақлиёти гаронвазн маҳдуд карда мешавад
20 МАЙ-РӮЗИ ҶАҲОНИИ МЕТРОЛОГИЯ. Дар Агентии «Тоҷикстандарт» конференсияи илмӣ-назариявӣ доир шуд
Дар Алҷазоир ҳамкории Ҷумҳурии Тоҷикистон бо Гурӯҳи Бонки исломии рушд баррасӣ гардид
Дар Душанбе маросими оғози татбиқи лоиҳаи «Асосҳои рақамикунонии Тоҷикистон» баргузор гардид
Чин ва кишварҳои Осиёи Марказӣ ҳамкориро дар соҳаи нақлиёт густариш медиҳанд
Дар Форуми 16-уми байналмилалии иқтисодӣ таҷрибаи Тоҷикистон дар рушди устувори шаҳрҳо муаррифӣ карда шуд
Рушди минбаъдаи долони нақлиётии мултимодалии «Чин-Тоҷикистон-Узбекистон-Туркманистон-Эрон-Туркия-Аврупо» баррасӣ гардид
Тоҷикистон ва Қирғизистон масъалаи барқарорнамоии ҳаракати автобусҳоро баррасӣ намуданд
Дар ноҳияи Данғара дар 27 820 гектар зироат кишт шудааст, ки нисбат ба ҳамин давраи соли 2024 141,7 фоиз зиёд аст
Дар семоҳаи якуми соли 2025 дар Тоҷикистон 159 корхона аз фаъолияти истеҳсолӣ боз мондааст