Раиси Девони вазирон — Роҳбари Дастгоҳи Президенти Ҷумҳурии Қирғизистон бо ҷараёни корҳои сохтмонӣ дар Неругоҳи барқи обии «Роғун» шинос шуд

ДУШАНБЕ, 04.03.2025. /АМИТ «Ховар»/. Дар доираи сафари корӣ ба Ҷумҳурии Тоҷикистон Раиси Девони вазирон — Роҳбари Дастгоҳи Президенти Ҷумҳурии Қирғизистон Адилбек Касималиев ҳамроҳ бо Сарвазири Ҷумҳурии Тоҷикистон Қоҳир Расулзода бо ҷараёни корҳои сохтмонӣ дар Неругоҳи барқи обии «Роғун» шинос шуд.

Таъкид гардид, ки 29 октябри соли 2016 бо иштироки Президенти Ҷумҳурии Тоҷикистон муҳтарам Эмомалӣ Раҳмон маҷрои дарёи Вахш тағйир дода шуд ва таҳкурсии иншооти баландтарини гидроэнергетикии дунё — сарбанди Неругоҳи барқи обии «Роғун» бо баландии 335 метр поягузорӣ гардид.

16 ноябри соли 2018 нахустагрегати Неругоҳи барқи обии «Роғун» аз ҷониби Пешвои миллат муҳтарам Эмомалӣ Раҳмон ба кор андохта шуд ва нахустбарқи «Роғун» тавлид гардид.

9 сентябри соли 2019 дар рӯзи ҷашни Истиқлол дуюмин агрегати Неругоҳи барқи обии «Роғун» бо пахши тугмаи рамзӣ аз ҷониби Сарвари давлат муҳтарам Эмомалӣ Раҳмон ба тавлиди барқ оғоз намуд ва то имрӯз ба нафъи иқтисоди миллии мамлакат ва шукуфоии Тоҷикистон хизмат мекунад.

Имрӯз неругоҳи «Роғун» тибқи дастуру роҳнамоӣ ва ҳидоятҳои Президенти мамлакат муҳтарам Эмомалӣ Раҳмон ба арсаи нангу номус, майдони заҳмату меҳнат чун рамзи воқеии ватандӯстию меҳанпарастӣ, кафолати ободии имрӯзу фардои мардуми шарифи мамлакат, сарсабзии давлати соҳибистиқлол ва миллати офарандаю бунёдкори тоҷик табдил ёфтааст.