Ширкати фаронсавии EDF дар дарёи Зарафшон корҳои омӯзишӣ мегузаронад

ДУШАНБЕ, 03.03.2025 /АМИТ «Ховар»/. Масъалаҳои густариши ҳамкории дуҷониба дар соҳаи энергетика ва захираҳои об  байни  Тоҷикистон ва Фаронса дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо Сафири Фаронса дар Тоҷикистон хонум Элза Пинёл ва намояндагони ширкати Electricite de France S.A. (EDF)  дар Душанбе баррасӣ шуданд.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад, ки тарафҳо аз сатҳи кунунии ҳамкорӣ изҳори қаноатмандӣ ва таҳкими минбаъдаи муносибатҳои стратегӣ дар соҳаи энергетикаро таъкид намуданд.

Ҷониби фаронсавӣ ба тақвият додани ҳамкорӣ, аз ҷумла иштироки ширкати EDF дар гузаронидани корҳои омӯзишӣ дар тарҳҳои  сохтмони неругоҳҳои барқи обӣ дар дарёи Зарафшон  ва ҳамкорӣ бо ширкати муштараки Тоҷикистону Узбекистон «ТАУЗ Гидро» мароқ зоҳир намуд.

АКС: Вазорати энергетика ва захираҳои оби Ҷумҳурии Тоҷикистон