Соли 2025 дар Тоҷикистон раванди татбиқи 32 ҳуҷҷати стратегӣ мавриди баррасӣ қарор мегирад

ДУШАНБЕ, 02.03.2025. /АМИТ «Ховар»/. Дар Вазорати рушди иқтисод ва савдо таҳти роҳбарии муовини Вазири рушди иқтисод ва савдо Аҳлиддин Нуриддинзода ва бо иштироки намояндагони вазорату идораҳои дахлдор ҷаласаи аввалини Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ баргузор шуд. Дар ин хусус АМИТ «Ховар» бо истинод ба Вазорати рушди иқтисод ва савдо хабар медиҳад.

Дар ҷаласа раванди иҷрои се ҳуҷҷати банақшагирии стратегӣ, аз ҷумла «Консепсияи сиёсати ҳуқуқии Ҷумҳурии Тоҷикистон барои солҳои 2018–2028», «Стратегияи омӯзиш ва рушди фанҳои риёзӣ, дақиқ ва табиӣ дар соҳаи маориф ва илм барои давраи то соли 2030» ва «Барномаи рушди соҳаи харгӯшпарварӣ дар Ҷумҳурии Тоҷикистон барои солҳои 2022–2026» баррасӣ гардид.

Тибқи нақшаи Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ,  дар соли 2025 раванди татбиқи 32 ҳуҷҷати стратегӣ мавриди баррасӣ қарор мегирад. Натиҷаҳои таҳлил ва арзёбӣ дар шакли гузориши муфассал ба Ҳукумати Ҷумҳурии Тоҷикистон пешниҳод хоҳанд шуд.

АКС: Вазорати рушди иқтисод ва савдои Ҷумҳурии Тоҷикистон