Татбиқи «Барномаи рушди иҷтимоию иқтисодии ноҳияи Роштқалъа барои солҳои 2021-2025» баррасӣ гардид

ДУШАНБЕ, 01.03.2025. /АМИТ «Ховар»/. Соли равон татбиқи «Барномаи рушди иҷтимоию иқтисодии ноҳияи Роштқалъа барои солҳои 2021-2025» ба анҷом мерасад. Тибқи он бунёду барқарорсозии 92 лоиҳа ба маблағи 222 миллиону 294 ҳазор сомонӣ нақшабандӣ шуда буд. Дар ин хусус 28 феврал зимни баргузории машварати васеъ дар  Вилояти Мухтори Кӯҳистони Бадахшон иттилоъ дода шуд.

Тавре аз Мақомоти иҷроияи ҳокимияти давлатии Вилояти Мухтори Кӯҳистони Бадахшон ба АМИТ «Ховар» иттилоъ доданд, давоми солҳои 2021-2024 ба иҷрои бандҳои барнома аз ҳисоби ҳамаи сарчашмаҳои маблағгузорӣ барои бунёду барқарорсозии иншоот 155 миллиону 428 ҳазор сомонӣ равона гардид. Соли 2024 бо саъю кӯшиши ҳамаҷонибаи Мақомоти иҷроияи ҳокимияти давлатии ноҳияи Роштқалъа дар ҳамкорӣ бо вазорату идораҳои дахлдор, шарикони рушд ва соҳибкорон 7 банди барнома иҷро гардид.

Ҳамчунин иттилоъ дода шуд, ки дар Вилояти Мухтори Кӯҳистони Бадахшон тибқи «Барномаи давлатии муҳити дастрас  барои солҳои 2021-2025» барои рушди тадбирҳои дастгирии иҷтимоии маъюбон, фароҳам овардани имконияти баробар ҷиҳати иштирок дар ҳаёти ҷомеа ва баланд бардоштани сатҳи зиндагии онҳо тадбирҳо амалӣ гардиданд.  Вобаста ба бандҳои нақшаи чорабиниҳои амалишуда дар қаламрави вилоят шиносномадиҳӣ ба иншоот ва хизматрасонӣ дар соҳаҳои фаъолияти ҳаётӣ барои маъюбон бо ҷалби намояндагони ташкилоти ҷамъиятии маъюбон гузаронида шуд. Бо мақсади  таъмини дастрасии маъюбон ба иншооти инфрасохтори иҷтимоии амалкунанда боғҳо, пиёдагардҳо ва гузаргоҳҳои пиёдагард барои маъюбон мутобиқ карда шуданд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон