Ҳамкории дуҷонибаи Тоҷикистон ва Амороти Муттаҳидаи Араб дар бахши сармоягузорӣ ва идораи амволи давлатӣ баррасӣ гардид

ДУШАНБЕ, 09.04.2025 /АМИТ «Ховар»/. Густариши ҳамкории дуҷониба дар бахши сармоягузорӣ ва идораи амволи давлатӣ байни  Тоҷикистон ва Амороти Муттаҳидаи Араб дар мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо директори генералии Гурӯҳи сармоягузории Абузабӣ (ADIG) Заид бин Рашид бин Авейда Ал Кубайсӣ дар Абузабӣ баррасӣ шуд.

Дар ин хусус АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.

Мулоқот дар доираи Конгресси AIM (Annual Investment Meeting) баргузор гардид.

Ҷониби Амороти Муттаҳидаи Араб ба дастгирии рушди истеҳсоли энергияи «сабз» ва тавсеаи инфрасохтори сайёҳӣ дар Ҷумҳурии Тоҷикистон таваҷҷуҳи хосса зоҳир намуд.

Инчунин ҷонибҳо омодагии худро барои омӯзиши имконияти нави ҳамкорӣ ва таҳкими шарикии дарозмуддат таъкид намуданд.

 АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон