«Амонатбонк» дар доираи «Моҳи саводнокии молиявӣ» дар Ашт ҳамоиш доир намуд

ДУШАНБЕ, 10.04.2025 /АМИТ «Ховар»/. Дар доираи «Моҳи саводнокии молиявӣ» аз ҷониби Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» дар филиали №26-и ноҳияи Ашт бо иштироки 800 хонандаи мактабҳои миёна, ҷавонон ва муштариёни «Амонатбонк» ҳамоиш доир шуд.

АМИТ «Ховар» бо истинод ба «Амонатбонк» иттилоъ медиҳад, ки ҳадафи ҳамоиш аз баланд бардоштани  маърифати молиявии ҷавонону муштариёни «Амонатбонк» ва ҳифзи ҳуқуқи истеъмолкунандагони хизматрасониҳои молиявӣ иборат буд.

Дар  ҳамоиш кормандони сохторҳои дастгоҳи марказии «Амонатбонк» дар мавзуъҳои  гуногуни соҳаи бонкдорӣ, алалхусус «Хизматрасониҳо тавассути замимабарномаи «Амонат — мобайл», «Хизматрасониҳо тавассути кортҳои пардохтӣ», нақши пул ва қоидаҳои идоракунии он, банақшагирии молиявӣ ва буҷети оила ва нақши бонкҳо дар рушди иқтисодиёт ба иштирокдорони ҳамоиш  маълумоти муфассал пешниҳод намуданд.

Баргузор намудани чунин ҳамоишҳо барои баланд бардоштани маърифати молиявии аҳолӣ, азхуд кардани маълумоти зарурӣ оид ба хизматрасонии бонкӣ ва таблиғу ташвиқи дастовардҳои соҳаи бонкдорӣ заминаи мусоид фароҳам менамояд.

АКС: «Амонатбонк»