Дар Чин бар асари тӯфон садҳо парвоз қатъ гардиданд

ДУШАНБЕ, 14.04.2025 /АМИТ «Ховар»/. Бар асари тӯфони рӯзи шанбе дар Пекин ва Чини Шимолӣ баамаломада садҳо парвоз қатъ ва ҳаракати қатораҳо манъ гардид, хабар медиҳад агентии «Kazinform» бо истинод ба  «BBC News».

Ба маълумоти агентии иттилоотии «Reuters», рӯзи шанбе то соати 11:30 ба вақти маҳаллӣ дар ду фурудгоҳи бузурги пойтахт 838 парвоз мавқуф гузошта шуд.

Шиддати шамол бо суръати то 93 мил (150 км/соат) — пурқувваттарин шамол дар пойтахти Чин дар муддати беш аз ним аср рӯзҳои истироҳатӣ низ идома ёфт, ки сабаби  баста шудани мавзеъҳои тамошобоб ва маконҳои таърихӣ гардид.

Рӯзи ҷумъа миллионҳо нафар маҷбур шуданд, ки дар дохили хона бимонанд ва баъзе расонаҳои давлатӣ ҳушдор доданд, ки шамол одамонеро, ки вазнашон аз 50 кг камтар аст, метавонад «ба осонӣ тела диҳад».

Тавре қаблан хабар расида буд, дар баъзе минтақаҳои халиҷи Бохай, Баҳри Зард ва Баҳри Чини Шарқӣ тӯфонҳо бо шиддати то 13 дараҷа  пешбинӣ шудаанд.

Дар Чин низоми  чаҳорсатҳаи огоҳкунандаи обу ҳаво амал менамояд: ранги сурх баландтарин буда, пас аз он норинҷӣ, зард ва кабуд меистанд.

Ёдовар мешавем, ки моҳи апрели соли 2024 дар Чин бар асари бориши шадид сатҳи хатари норинҷӣ эълон шуда буд.

АКС аз манбаъҳои боз