Дар ноҳияи Рӯдакӣ дурнамои кишти чигит сари вақт иҷро мегардад

РӮДАКӢ, 26.04.2025 /АМИТ «Ховар»/. Кишоварзони ноҳияи Рӯдакӣ имрӯзҳо бо истифода аз ҳавои мусоид дар зиёда аз 250 гектар  чигит кишт намуданд. Дар ин хусус  ба хабарнигори минтақавии АМИТ «Ховар» Субҳониддини Маҳмуд  аз Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Мувофиқи  дурнамои  кишти зироати кишоварзӣ, дар мавсими имсола бояд дар 350 гектар  заминҳои сохтори кишоварзӣ ва хоҷагиҳои деҳқонии инфиродии  ноҳияи Рӯдакӣ чигит кишт шавад. Хушбахтона, бо мусоид омадани ҳаво кишоварзон пунбадона ва дигар намуди маҳсулоти кишоварзиро сари вақт кишт менамоянд.

Бояд гуфт, ки кишоварзӣ дар Ҷумҳурии Тоҷикистон яке аз соҳаҳои муҳими иқтисоди миллӣ буда, таъмини ҳадафи стратегии ҳукумат- амнияти озуқавории мамлакат  асосан аз сатҳи рушди он вобаста мебошад. Аз ин рӯ дар ноҳияи Рӯдакӣ ба ин соҳа таваҷҷуҳи махсус зоҳир гардида, барои вусъати майдонҳои кишт, обёрӣ ва ба гардиши кишоварзӣ ворид намудани заминҳои бекорхобида, таъмини техника ва дар ҳолати хуб нигоҳ доштани заминҳои киштшаванда пайваста тадбирҳо андешида мешаванд.

Аз ин хотир дар ҳудуди ҷамоатҳои шаҳраку деҳоти ноҳия  кишти чигит идома дошта, то охири моҳ нақшаи дурнамо 100% иҷро мегардад.

АКС: Мақомоти иҷроияи ҳокимияти давлатии ноҳияи Рӯдакӣ