Дар Вашингтон ҷалби маблағгузорӣ ва татбиқи созишномаҳои молиявӣ барои идомаи сохтмони НБО «Роғун» баррасӣ шуд

ДУШАНБЕ, 22.04.2025 /АМИТ «Ховар»/. Масъалаҳои марбут ба идомаи сохтмони Неругоҳи барқи обии «Роғун», ҷалби маблағгузории иловагӣ, татбиқи созишномаҳои молиявии мавҷуда ва ҳамоҳангсозии минбаъдаи шарикони рушд 21 апрел дар мулоқоти Вазири молияи Ҷумҳурии Тоҷикистон Файзиддин Қаҳҳорзода бо Директори минтақавии бахши инфрасохтории Бонки ҷаҳонӣ дар Аврупо ва Осиёи Марказӣ Чарлз Кормэ муҳокима шуданд.

Тавре АМИТ «Ховар» бо истинод ба Вазорати молияи ҷумҳурӣ хабар медиҳад, мулоқот дар доираи ҷаласаҳои баҳории Гурӯҳи Бонки ҷаҳонӣ ва Хазинаи байналмилалии асъор дар шаҳри Вашингтони Иёлоти Муттаҳидаи Амрико баргузор шуд.

Чарлз Кормэ лоиҳаи Неругоҳи барқи обии «Роғун»-ро ҳамчун  тарҳи муҳими минтақавӣ арзёбӣ намуда, иброз намуд, ки ин неругоҳ на танҳо ба коҳиши норасоии неруи барқ дар Тоҷикистон мусоидат мекунад, балки энергияи аз лиҳози экологӣ тозаро ба мамлакатҳои ҳамсоя содирот менамояд.

Вазири молия ба Бонки ҷаҳонӣ барои дастгирии пайваста ва саҳми назаррас дар пешбурди лоиҳаи Неругоҳи барқи обии «Роғун» изҳори миннатдорӣ намуда, омодагии вазоратро барои таҳкими ҳамкорӣ ва татбиқи самараноки созишномаҳои молиявӣ баён намуд.

АКС: Вазорати молияи Ҷумҳурии Тоҷикистон