Дастаи мунтахаби наврасони Тоҷикистон (U-17) панҷ бозии санҷишӣ анҷом дод

ДУШАНБЕ, 01.04.2025 /АМИТ «Ховар»/. Дар доираи омодагӣ ба қисми ниҳоии Ҷоми Осиё-2025 дастаи наврасони Тоҷикистон (U-17) таҳти роҳбарии Марко Раҷини дар ҷамъомадҳои таълимию тамринӣ дар Қатар ва Арабистони Саудӣ панҷ бозии санҷишӣ анҷом дод, хабар медиҳад АМИТ «Ховар» бо истинод ба Федератсияи футболи Тоҷикистон.

Дар шаҳри Давҳа дастаи мунтахаби наврасони мо бо ҳамсолонашон аз Қатар ду рақобати санҷишӣ доир намуд. Ҳарду вохӯрӣ бо натиҷаҳои мусовӣ – 3:3 ва 2:2 ба анҷом расиданд.

Дар шаҳри Абҳаи Арабистони Саудӣ ҷамъомади тамринии дуюми дастаи мунтахаби наврасони Тоҷикистон (U-17) баргузор шуд. Инҷо шогирдони Марко Раҷини бо тими Арабистони Саудӣ ду вохӯрии санҷишӣ (0:2 ва 1:1) ва бо дастаи Австралия як бозии санҷишӣ (2:2) доир намуданд.

Бояд гуфт, ки дар қисми ниҳоии Ҷоми Осиё-2025, ки аз 3 то 20 апрел дар Арабистони Саудӣ баргузор мешавад, дастаи мунтахаби наврасони Тоҷикистон (U-17) дар гурӯҳи «D» бо дастаҳои Уммон (5 апрел), Кореяи Шимолӣ (8 апрел) ва Эрон (11 апрел) рақобат менамояд.

АКС: Федератсияи футболи Тоҷикистон