ДУШАНБЕ-ШАҲРИ КӮДАКОНИ ХУШБАХТ! Дар пойтахт сохтмони 56 муассисаи таҳсилоти томактабӣ идома дорад
ДУШАНБЕ, 19.04.2025. /АМИТ «Ховар»/. Тибқи маълумоти оморӣ, ба ҳолати 1 январи соли 2024 дар пойтахти Тоҷикистон-шаҳри Душанбе 1 миллиону 241 ҳазор нафар истиқомат менамоянд. Вобаста ба ин дар пойтахт барои рушди иҷтимоию иқтисодӣ ва инфрасохтори шаҳрӣ тадбирҳои судманд андешида мешаванд. Яке аз ин тадбирҳо зиёд намудани шумораи муассисаҳои томактабӣ буда, бо ин мақсад бахшида ба 35-солагии Истиқлолияти давлатии Ҷумҳурии Тоҷикистон дар пойтахт аз ҳисоби бахши хусусӣ бунёду сохтмони 56 муассисаи таҳсилоти томактабӣ ба нақша гирифта шудааст.
Тавре ба АМИТ «Ховар» аз Сарраёсати маорифи шаҳри Душанбе хабар доданд, муассисаҳои томактабӣ барои 11 ҳазору 340 ҷой пешбинӣ карда шудаанд. Аз ин шумора то оғози соли нави таҳсили 2025-2026 ба истифода додани 10 муассиса барои 2070 ҷой ба нақша гирифта шудааст.
Аз ҷумла, соли 2024 муассисаи таълимии томактабии хусусии «Ахтарак» дар ноҳияи Сино (бинои иловагӣ) барои 20 ҷой, муассисаи таълимии томактабии «Шоҳнома» дар ноҳияи Шоҳмансур барои 200 ҷой ба истифода дода шуд.
Инчунин соли 2025 (ба ҳолати семоҳаи якуми соли 2025) аз ҳисоби бахши хусусӣ дар пойтахт муассисаи таҳсилоти томактабии хусусии «Боғи Мурод» дар ноҳияи Фирдавсӣ барои 450 ҷой сохта ва ба истифода дода шуд.
Бояд таъкид намуд, ки бо назардошти он ки зинаи таҳсилоти томактабӣ барои ташаккули қобилияти зеҳнии кӯдакон марҳилаи хеле муҳим ба ҳисоб меравад, Ҳукумати мамлакат ба бунёди муассисаҳои томактабӣ эътибори аввалиндараҷа ва доимӣ медиҳад.
Бо ин мақсад дар ҷумҳурӣ «Барномаи рушди муассисаҳои томактабӣ ва таҳсилоти умумии хусусӣ барои солҳои 2022-2027» қабул гардидааст, ки тибқи ин заминаи моддӣ-техникии муассисаҳои томактабӣ ва таҳсилоти умумии хусусӣ беҳтар гардонида шуда, шартҳои ташкили муассисаҳои таълимии хусусӣ бо ҷалби соҳибкорон ба соҳаи маориф мукаммал мегардад. Инчунин дастгирии давлатӣ тақвият ёфта, механизмҳои ҳавасмандгардонии бахши хусусӣ такмил меёбанд.
Аз ҷумла, дар шаҳри Душанбе бо ҷалби соҳибкорони ватанӣ аз ҷониби Ҷамъияти дорои масъулияти маҳдуди «Сохтмон-таъминот» дар маҳаллаи «Ховарон, минтақаи 15» сохтмони муассисаи томактабӣ барои 120 ҷой иидома дорад. Инчунин аз ҷониби Ҷамъияти дорои масъулияти маҳдуди «Леваканд-Сангрез» дар кӯчаи Деҳотӣ сохтмони муассисаи томактабӣ барои 100 ҷо ва аз ҷониби Ҷамъияти дорои масъулияти маҳдуди «Саноати кӯҳкорӣ» дар шаҳраки 104-и ноҳияи Синои пойтахт бунёди кӯдакистон барои 450 ҷой идома дорад.
Бояд таъкид намуд, ки зинаи томактабӣ ё омӯзиши барвақтии кӯдак барои гирифтани таҳсили минбаъда дар мактаб заминаи асосӣ мегузорад. Он алоқамандии байни оила ва мактабро таъмин намуда, дар ҳаёти кӯдак қадами муҳимтарин ба ҳисоб меравад.
Аз ин хотир хуб мешуд, ки дигар соҳибкорон аз ҷониби мақомоти иҷроияи ҳокимияти давлатии вилоят ва шаҳру ноҳияҳо дастгирӣ ёбанд, то имконият пайдо намоянд, ки муассисаҳои томактабӣ ва миёнаи умумии хусусӣ таъсис диҳанд.
Зеро бунёди муассисаҳои таълимии замонавӣ маҳз ба беҳтар шудани сатҳу сифати таълиму тарбия дар мамлакат нигаронида шуда, ба истифодадиҳии онҳо то 35-солагии Истиқлолияти давлатӣ марҳила ба марҳила дар назар дошта шудааст. Насли навраси имрӯза бояд аз чунин имконоти мусоиди фароҳамсохтаи давлат ва Ҳукумати мамлакат самаранок истифода намуда, барои боз ҳам беҳтар аз бар намудани донишҳои муосир ҳамаҷониба кӯшиш намояд.
Зарангези ЛАТИФ,
АМИТ «Ховар»
АКС: Сарраёсати маорифи шаҳри Душанбе








Дар Душанбе бахшида ба Рӯзи Президент ҳамоиши тантанавӣ доир гардид
Эҳтиром ба Рӯзи Президент эҳтиром ба давлат, миллат, Истиқлолияти давлатӣ ва сулҳу ваҳдат аст
ИҶЛОСИЯИ XVI ШУРОИ ОЛӢ ВА ТАШАККУЛИ НИЗОМИ НАВИ ИДОРАКУНИИ ДАВЛАТ. Андешаҳо дар ин маврид
Бахшида ба Рӯзи Президент дар пойтахт хатсайрҳои сайёҳии маърифатӣ ташкил карда шуданд
СИЁСАТИ ХОРИҶИИ ТОҶИКИСТОН – НАМУНАИ ДИПЛОМАТИЯИ МУТАВОЗИНУ СОЗАНДА. Эҳдо ба Рӯзи Президенти Ҷумҳурии Тоҷикистон
Собиқ вакили Шурои Олӣ Адолат Раҳмонова: «Роҳи расидан ба сулҳ басо душвор, пурмонеа ва ноҳамвор буд»
НАҶОТБАХШИ ДАВЛАТУ МИЛЛАТ. Эҳдо ба Рӯзи Президенти Ҷумҳурии Тоҷикистон
АЗ СОЛИ БАЙНАЛМИЛАЛИИ ОБИ ТОЗА ТО РӮЗИ БАЙНАЛМИЛАЛИИ ЗЕҲНИ СУНЪИИ БЕХАТАР, ҲИФЗШУДА ВА БОЭЪТИМОД. Андешаҳо дар ин маврид
ПРЕЗИДЕНТИ ТОҶИКИСТОН ДАР ФЕҲРИСТИ СИЁСАТМАДОРОН ВА ШАХСИЯТҲОИ ШИНОХТАИ ҶАҲОН МАҚОМИ ШОИСТА ДОРАНД. Андешаҳои сиёсатмадорони ҷаҳон дар ин хусус
РӮЗИ ПРЕЗИДЕНТ ВА ТАҶАССУМИ ИРОДАИ ТАЪРИХИИ МИЛЛАТ ДАР БУНЁДИ ДАВЛАТДОРИИ НАВИН. Мулоҳизаҳои академик Фарҳод Раҳимӣ
Зеҳни сунъӣ ба яке аз технологияҳои серталабтарини асри рақамӣ аз лиҳози истеъмоли неруи барқ табдил меёбад






