Файзалӣ Идизода дар Волгоград аз қаҳрамониҳои халқи тоҷик зимни озод намудани Сталинград ёдовар шуд

ДУШАНБЕ, 29.04.2025 /АМИТ «Ховар»/. Тавре қаблан иттилоъ додем, ҳайати парлумонии Тоҷикистон таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода дар Форуми байналмилалии «Мероси бузург – ояндаи муштарак» дар шаҳри Волгогради Федератсияи Русия иштирок менамояд.

28 апрел ҳайати парлумонии Тоҷикистон дар маросими гулчанбаргузорӣ дар назди оташи абадӣ дар маҷмааи рамзии хотира ва қаҳрамонии Мамаев Қӯрғон иштирок намуданд.

Сипас ҳайати парлумонии Тоҷикистон дар маҷмааи ёдгории таърихии «Қаҳрамонони муҳорибаи Сталинград» хотираи нафарони дар ин ҷанг ҳалокшударо гиромӣ дошта, бо экспонатҳои музей, ки бозгуйи аҳамияти муҳорибаи Сталинград дар таърихи ҷаҳон ва қаҳрамониҳои фарзандони далери халқи тоҷик дар сафи Армияи Сурх барои озод кардани Сталинград мебошанд, шинос шуданд. Садҳо зодагони Тоҷикистон дар майдони муҳорибаҳо далерию шуҷоат нишон дода, шумораи зиёди онҳо дар роҳи муҳофизати Сталинград ва таъмини Ғалабаи бузург ҷони худро нисор намуданд. Корнамоии онҳо як қисми мероси умумии таърихӣ аст, ки халқҳои Иттиҳоди Шуравиро ба ҳам мепайвандад.

Ҳайати парлумонии Тоҷикистон ҳамчунин дар кори бахши форум таҳти унвони «Ҳифз ва ҳимояи хотираи умумии таърихӣ», ки дар он масъалаҳои муҳимтарини ҳамкории байналмилалии башардӯстона, ҳифзи ҳақиқат дар хусуси набардҳои Ҷанги дуюми ҷаҳонӣ ва ҳамкории байнидавлатӣ дар соҳаи маорифу таърих баррасӣ шуданд, иштирок намуд.

Ёдовар мешавем, ки Форуми байналмилалии «Мероси бузург – ояндаи муштарак» дар шаҳри Волгоград ба 80-солагии Ғалабаи бузург дар Ҷанги дуюми ҷаҳонӣ (1941-1945), ки дастоварди нодир ва самари дӯстию бародарии ҳамаи халқҳои собиқ Иттиҳоди Шуравӣ аст, бахшида шудааст.

АКС: Маҷлиси намояндагони Маҷлиси Олии Ҷумҳурии Тоҷикистон