Имконоти низоми молиявии Тоҷикистон дар конфронси 23-юми солонаи Шурои шариатии AAOIFI муаррифӣ гардид

ДУШАНБЕ, 22.04.2025 /АМИТ «Ховар»/. Дастовардҳо ва имконоти низоми молиявии Тоҷикистон дар конфронси 23-юми солонаи Шурои шариатии Ташкилоти баҳисобгирии муҳосибӣ ва аудит (AAOIFI), ки 20–21 апрел дар шаҳри Манамаи Шоҳигарии Баҳрайн барои муассисаҳои молиявӣ баргузор гардид, муаррифӣ шуданд, иттилоъ медиҳад АМИТ «Ховар» бо истинод ба Бонки миллии Тоҷикистон.

Дар конфронси 23-юми солонаи AAOIFI аз Тоҷикистон муовини якуми раиси Бонки миллии Тоҷикистон Фируз Шарифзода иштирок ва суханронӣ намуд.

Конфронси 23-юми солонаи AAOIFI яке аз муҳимтарин рӯйдодҳои сатҳи байналмилалӣ дар соҳаи молияи исломӣ маҳсуб шуда, дар кори он олимони маъруфи соҳаи бонкдории исломӣ, намояндагони мақоми танзимкунанда, роҳбарони ташкилоти молиявӣ, намояндагони бонкҳои марказӣ ва коршиносони соҳаи молияи исломӣ аз кишварҳои гуногун иштирок намуданд.

Конфронс ба баррасии масоили марбут ба ҳамоҳангсозии меъёрҳои бонкдории исломӣ, ҳамгироии технологияҳои молиявӣ ва татбиқи молияи ахлоқӣ дар низомҳои молиявии мутобиқ ба принсипҳои бонкдории исломӣ бахшида шуда, саҳнаи муҳимми табодули таҷриба ва таҳкими ҳамкорӣ байни кишварҳо арзёбӣ мегардад.

Фируз Шарифзода дар ҷаласаи ифтитоҳӣ оид ба дастовардҳои низоми молиявии Тоҷикистон, имконияти сармоягузорӣ ва нақши Бонки миллии Тоҷикистон дар ташаккул ва рушди бонкдории исломӣ сухан намуда, ба иштирокдорон оид ба мавқеи Тоҷикистон дар самти риоя ва татбиқи меъёрҳои байналмилалӣ, тақвияти асосҳои ҳуқуқӣ ва амалии бонкдории исломӣ маълумот дод.

Аз ҷониби созмондиҳандагони конфронс нақши Бонки миллии Тоҷикистон дар рушди заминаи ҳуқуқӣ ва институтсионалии молияи исломӣ баланд арзёбӣ гардида, муовини якуми раиси Бонки миллии Тоҷикистон бо ҷоизаи махсуси AAOIFI, ки нишони эътирофи саҳми назарраси Ҷумҳурии Тоҷикистон дар рушди бахши молияи минтақавӣ ва байналмилалӣ мебошад, қадрдонӣ карда шуд.

Дар ҳошияи конфронс Фируз Шарифзода бо роҳбарони чанд бонки марказӣ ва намояндагони созмонҳои молиявии байналмилалӣ мулоқот анҷом дод. Ҳамзамон оид ба густариши ҳамкории дуҷониба, ҷалби коршиносони байналмилалӣ ва ташкили омӯзишҳои муштарак барои мутахассисони низоми молиявии Тоҷикистон табодули афкор карда шуд.

АКС: Бонки миллии Тоҷикистон