Имсол дар Хатлон қариб 500 ҳазор тонна пиёз ҷамъоварӣ карда мешавад

ДУШАНБЕ, 27.04.2025. /АМИТ «Ховар»/. Тибқи таҳлилҳо, имсол дар вилояти Хатлон ҳосили пиёзи барвақтӣ қариб 500 ҳазор тоннаро ташкил медиҳад. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Тавре қаблан иттилоъ додем, то оғози моҳи апрел дар 14 433 гектар хоҷагиҳои деҳқонӣ ва ҷамъиятии ҷумҳурӣ пиёз кишт шудааст, ки 83,6 фоиз нақшаро ташкил медиҳад. Аз он 12 281 гектар кишти пиёзи барвақтӣ мебошад. Имсол дар шаҳру ноҳияҳои вилоят дар 9690 гектар пиёзи барвақтӣ кишт карда шудааст, ки барои ҷамъоварӣ омода мебошад.

Иттилоъ дода шуд, ки кишоварзони вилоят солона қариб 3 миллион тонна маҳсулоти кишоварзӣ истеҳсол менамоянд. Иқтидори истеҳсолӣ дар бахшҳои саноату кишоварзӣ ва дигар бахшҳои муҳими давлатӣ зиёд мебошад. Хусусан, беш аз 60 фоизи маҳсулоти кишоварзиро дар ҷумҳурӣ кишоварзони вилоят истеҳсол намуда, дар баробари таъмини бозори дохилӣ ба давлатҳои Осиёи Марказӣ ва берун аз он содирот менамоянд.

АКС: АМИТ «Ховар»