Имсол дар шаҳри Кӯлоб беш аз 2 тонна пиллаи хушсифат истеҳсол карда мешавад

ДУШАНБЕ, 24.04.2025  /АМИТ «Ховар»/. Имсол кирмакпарварони шаҳри Кӯлоб нақша доранд, ки 2 тоннаю 700 килограмм пиллаи хушсифат истеҳсол намоянд.

Тавре ба АМИТ «Ховар» намояндаи Ҷамъияти саҳомии кушодаи «Пиллаи Тоҷик» дар шаҳри Кӯлоб Раҷабалӣ Абдураҳмонов иттилоъ дод, «ба сокинон ва хоҷагиҳои деҳқонӣ 90 қуттӣ кирмаки пилла, ки 13 килограмму 500 граммро ташкил медиҳад, тақсим карда шуд. Умед аст, ки аз ҳар қуттӣ  30 килограмм ашёи хом истеҳсол карда мешавад».

Гуфта шуд, ки 90 қуттӣ пилла ба 119 хоҷагӣ тақсим карда шудааст, ки ин 100 фоизи нақшаро ташкил медиҳад. Барои парвариши кирмак дар шаҳри Кӯлоб беш аз 5000 бех дарахти тут мавҷуд аст.

Президенти Ҷумҳурии Тоҷикистон муҳтарам Эмомалӣ Раҳмон  дар Паём ба Маҷлиси Олии Ҷумҳурии Тоҷикистон аз 21 декабри соли 2021 аз сохтору мақомоти дахлдор даъват ба амал оварданд, ки кирмакпарвариро рушд диҳанд ва махсусан барои занону духтарон ҷойи нави кор таъсис диҳанд. Сарвари давлат супориш доданд, ки давоми 10 сол заминҳои тут пурра озод ва ба коркарди пилла шуруъ карда шавад.

Кирмакпарварӣ ва коркарди пилла яке аз шуғлҳои қадимтарини мардуми тоҷик ва соҳаи сердаромаду афзалиятнок ба ҳисоб меравад. Истеҳсоли пилла барои бо ашёи хом таъмин намудани корхонаҳои саноатии мамлакат, бо шуғл фаро гирифтани аҳолӣ ва баланд бардоштани иқтидори истеҳсолии корхонаҳои ватанӣ аҳамияти калон дорад.

АКС: АМИТ «Ховар»