Майдонҳои зироати кишоварзии минтақаҳои Ҳисор ва Турсунзода аз жола ҳифз карда шуданд

ДУШАНБЕ, 10.04.2025. /АМИТ «Ховар»/. Аз ҷониби кормандони Хадамоти зиддижолаи Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон 9 апрел, аз соати 22:58 то 23:50 ба сӯи абрҳои жолазо дар минтақаҳои Ҳисор ва Турсунзода 12 мушак партоб карда шуд. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон иттилоъ медиҳад.

Корҳои безараргардонӣ бо мақсади ҳифи зироати кишоварзӣ аз бориши жола гузаронида шуданд.

Бино ба гузориши Хадамоти зиддижола, дар вақти муқарраргардида бо истифода аз партофти 12 мушак ба сӯи абрҳову жола дар минтақаҳои дорои хатар зарар ба заминҳои кишоварзӣ бартараф карда шуд.

Ёдовар мешавем, ки ҳамасола бо мақсади ҳифзи зироати кишоварзӣ ва боғу токзори мамлакат дар минтақаҳо бар зидди жола садҳо мушак истифода мешавад. Бориши жола маъмулан барои зироати кишоварзӣ зарари калон меорад.

Истифода аз мушакҳои зиддижола имкон фароҳам меорад, ки  хатари нобудшавии ҳосил бартараф карда шавад.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон