Омодагӣ барои фаъолияти мунтазаму самарабахш дар давраи тирамоҳу зимистони солҳои 2025-2026

ДУШАНБЕ, 09.04.2025 /АМИТ «Ховар»/. То 1 июни соли 2025 бояд нақшаи захиракунии маводи асосии ғизои босифату дастрас, аз ҷумла орд, равған, шакар, биринҷ, пиёз, картошка, консерваҳо ва маҳсулоти дигари озуқаворӣ дар бозорҳо, анбору  сардхонаҳо новобаста аз шакли моликияти онҳо таҳия ва тасдиқ гардад. Чунин омадааст дар банди 2.3-и «Нақшаи чорабиниҳо оид ба сари вақт омода намудани соҳаҳои иқтисодиёт ва иҷтимоиёти  ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2025-2026», ки бо Қарори Ҳукумати Ҷумҳурии Тоҷикистон аз  28 марти соли 2025 тасдиқ гардидааст.

Баҳри иҷрои ин банди Қарори Ҳукумати Ҷумҳурии Тоҷикистон Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳо, Агентии захираҳои моддии давлатӣ ва Иттифоқи «Тоҷикматлубот» вазифадор гардидаанд.

Ёдовар мешавем, ки тибқи қарори мазкур то 10 майи соли равон бояд вазорату идораҳо, Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳо, корхона, муассиса ва дигар ташкилот, новобаста аз шакли моликият бо мақсади таъмини фаъолияти  мунтазам ва самарабахш дар давраи тирамоҳу зимистони солҳои 2025-2026 бояд ситоди фаврӣ  таъсис дода, нақшаи чорабиниҳоро тасдиқ намоянд.

АКС аз бойгонӣ