Ширкатҳои сайёҳии Тоҷикистон, Қирғизистон ва Узбекистон ҳамкориро рушд медиҳанд

ДУШАНБЕ, 02.04.2025 /АМИТ «Ховар»/. 1 апрел дар шаҳри Бӯстони вилояти Суғд дар доираи Муколамаи минтақавии ҷумҳуриҳои Тоҷикистон, Қирғизистон ва Узбекистон таҳти унвони «Наврӯз – қадимтарин мероси фарҳангию сайёҳӣ дар минтақа» вохӯрии ширкатҳои сайёҳии ин давлатҳо баргузор гардид. Дар ин хусус ба АМИТ «Ховар» аз Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Зимни вохӯрӣ ширкатҳои сайёҳӣ тақвияти ҳамкорӣ, таҳияи хатсайрҳои сайёҳии муштараки минтақа, масъалаи бастани созишномаҳо ва табодули таҷрибаро баррасӣ намуданд.

Дар муколама ширкатҳои сайёҳии ватанӣ- Ҷамъияти дорои масъулияти маҳдуди «Бунёд тур», Ҷамъияти дорои масъулияти маҳдуди «Куҳандиз», Ҷамъияти дорои масъулияти маҳдуди «Тоҷикистон Тревел», Ҷамъияти дорои масъулияти маҳдуди «Зарафшон меҷестик тревел», Ҷамъияти дорои масъулияти маҳдуди «Сайри Бӯстон» иштирок намуда, барои рушди ҳамкории минбаъда ширкатҳояшонро ба ҳамтоёнашон муаррифӣ намуданд.

Инчунин дар ин рӯз ҳайатҳои расмӣ ва бахшҳои хусусии соҳаи сайёҳии ҷумҳуриҳои Тоҷикистон, Узбекистон ва Қирғизистон мавзеъҳои таърихию сайёҳии шаҳри Хуҷандро тамошо намуданд.

Меҳмонон дар Маҷмааи таърихию фарҳангии «Қалъаи Хуҷанд», ки яке аз мавзеъҳои ҷолиб ва тамошобоб барои сайёҳони дохилию хориҷӣ аст, бо  таъриху фарҳанг ва санъати меъмории халқи тоҷик шинос гардиданд.

АКС: Кумитаи рушди сайёҳии назди Ҳукумати Ҷумҳурии Тоҷикистон