Сокинони ноҳияи Панҷ дар заминҳои наздиҳавлигӣ бештар картошка кишт намудаанд

ДУШАНБЕ, 14.04.2025. /АМИТ «Ховар»/. Дар Ҷамоати деҳоти Озодагони ноҳияи Панҷ хоҷагии деҳқонии «Ҳоҷӣ Уроқ» фаъолият менамояд, ки дорои 14 гектар замин мебошад. Дар 13 гектари он пунбадонаи зери плёнка ва дар заминҳои боқимонда картошка, помидор ва бодиринг кишт намудаанд.

Тавре аз хадамоти матбуоти Раиси вилояти Хатлон ба АМИТ «Ховар» иттилоъ доданд, сокинони ин ноҳия дар қитъаҳои заминҳои наздиҳавлигияшон бештар  картошка кишт намуда, ҳамсола то ду-се ҳосил ба даст меоранд.

Иттилоъ дода шуд, ки дар ин ноҳия замин самаранок истифода бурда мешавад.

Дар ноҳия инчунин Кооперативи тиҷоратии тухмипарварӣ фаъолият менамояд. Кооператив дорои 1341 гектар замин буда, дар 700 гектари он имсол чигит кишт карда мешавад. Кишоварзон аз тухмии навъҳои «Лазер», «Дӯстӣ», «Элита» ва «Лотос» истифода менамоянд.

1044 гектар заминҳои хоҷагиро заминҳои обӣ ташкил медиҳанд. Имсол ба ғайр аз пунбадона дар 453 гектар ғалла, дар 26 гектар сабзавот, дар 16 гектар пиёз, дар 13 гектар картошка ва дар 17 гектари дигар зироати хӯроки чорво кишт шудааст.

АКС: Хадамоти матбуоти Раиси вилояти Хатлон