«Тоҷикаэронавигатсия» ба зиёда аз 14 ҳазор киштии ҳавопаймоӣ хизмат расонидааст

ДУШАНБЕ, 23.04.2025 /АМИТ «Ховар»/. Дар натиҷаи барқарор гардидани иҷрои парвозҳои ширкатҳои ҳавопаймоӣ ва афзоиши ҷуғрофияи парвозҳо соли  равон Корхонаи воҳиди давлатии «Тоҷикаэронавигатсия» ва филиалҳои он дар фурудгоҳҳои байналмилалии Хуҷанд, Кӯлоб ва Бохтар ба 14 ҳазору 868 киштии ҳавопаймоӣ хизмат расониданд, иттилоъ медиҳад АМИТ «Ховар» бо истинод ба «Тоҷикаэронавигатсия».

Сабаби асосии афзоиши парвозҳо амалӣ гардидани парвозҳои транзитӣ аз ҷониби ширкатҳои ҳавопаймоии хориҷию ватанӣ мебошад. Дар ин давра  9 ҳазору 578 парвози транзитӣ  анҷом дода шуд.

Тибқи нақша, мутахассисони корхона ҳамзамон чорабиниҳои мунтазам оид ба барқарор намудани воситаҳои таъминоти радиотехникӣ, метеорологӣ ва дигар воситаҳои техникӣ  гузарониданд. Дар ин давра дараҷаи салоҳияти нишондодҳои пешгӯии Маркази метеорологии авиатсионӣ тибқи низоми «TAF»  90 фоизро ташкил дод.

Кормандону мутахассисони Корхонаи воҳиди давлатии «Тоҷикаэронавигатсия» минбаъд низ барои таъмини бехатарии парвозҳо дар ҳарими ҳавоии Ҷумҳурии Тоҷикистон, баланд бардоштани сатҳу сифати хизматрасонии аэронавигатсионӣ, афзоиши ҷуғрофияи парвозҳо ва такмили донишу малакаи мутахассисон тадбирҳои зарурӣ меандешанд.

         АКС аз манбаъҳои боз