«УМРЕ БО МУСИҚӢ». Дар Душанбе ҳамоиши илмӣ баргузор гардид

ДУШАНБЕ, 24.04.2025. /АМИТ «Ховар»/. 24 апрел дар Китобхонаи миллии Тоҷикистон таҳти унвони «Умре бо мусиқӣ» бахшида ба фаъолияти илмӣ-эҷодии доктори илмҳои санъатшиносӣ, профессор Аслиддин Низомӣ  ҳамоиши илмӣ баргузор гардид.

Тавре мухбири АМИТ «Ховар» хабар медиҳад, зимни ҳамоиш иштирокчиён дар мавриди фаъолияти эҷодии мусиқишиноси маъруфи тоҷик, доктори илми санъатшиносӣ, профессор, аъзои  Иттифоқи композиторони Тоҷикистон, профессори фахрии Консерваторияи миллии Узбекистон, ки дар самти таҳқиқи илми санъатшиносӣ хизматҳои шоён анҷом додааст, ибрози назар намуданд.

«Мусиқии тоҷик дар даврони соҳибистиқлолии мамлакат хеле тараққӣ намуда, на танҳо дар дохили мамлакат, инчунин дар арсаи ҷаҳонӣ миллати тоҷикро ҳамчун мардуми санъатдӯсту соҳибфарҳанг муаррифӣ намуд. Китобҳои таҳиянамудаи Аслиддин Низомӣ воситаи хуби омӯзишӣ барои фарҳангшиносон, адабиётшиносон, муаррихон, мутахассисони соҳаи санъатшиносӣ, устодон ва донишҷӯёни муассисаҳои таълимии соҳаи санъат, ҳамзамон доираи васеи хонандагон мебошанд»,-иброз гардид дар ҳамоиш.

Таъкид гардид, ки таърихи тамаддуни халқи тоҷик дорои садҳо ва ҳазорҳо намунаҳои олии шеъру мусиқӣ мебошад, ки шашмақому фалак мисоли беҳтарини онҳо аст. Аз ин сабаб таъриху тамаддуни халқи тоҷикро  бе ҳунари волои мусиқӣ тасаввур намудан ғайриимкон аст. Дар замони истиқлолият бо ғамхориву ҳидоятҳои  Пешвои миллат муҳтарам Эмомалӣ Раҳмон санъати мусиқӣ боз ҳам рушду такомул ёфта, дар сатҳи ЮНЕСКО эътироф гардид.

Ёдовар мешавем, ки мусиқишинос Аслиддин Низомӣ муаллифи чанд китобу рисола ва мақолаҳои илмӣ, аз ҷумла «Таърих ва назарияи Шашмақом», «Умре бо мусиқӣ», «Таърихи мусиқии тоҷик», «Шашмақом ва назми форсии тоҷикӣ» ва «Баёзи Шашмақом» мебошад.

АКС: Муассисаи давлатии «Китобхонаи миллӣ»