Вобаста ба рушди энергетика дар даврони истиқлолият конференсияи байналмилалӣ доир гардид

ДУШАНБЕ, 10.04.2025 /АМИТ «Ховар»/. 9 апрел дар Донишгоҳи техникии Тоҷикистон ба номи академик Муҳаммад Осимӣ таҳти унвони «Рушди соҳаи энергетика дар даврони истиқлол» конференсияи баналмилалии илмӣ-амалӣ баргузор шуд, хабар доданд ба АМИТ «Ховар» аз ин донишгоҳ.

Конференсия ба «Бистсолаи омӯзиш ва рушди фанҳои риёзӣ, дақиқ ва табиӣ дар соҳаи илму маориф» (2020-2040) бахшида шуда, аз ҷониби омӯзгорон, донишҷӯён, магистрантон ва докторантони дохилу хориҷи мамлакат зиёда аз 70 мақолаи илмӣ пешниҳод гардид.

Дар конференсия иброз шуд, ки имрӯз бо шарофати сиёсати пешгирифтаи давлату Ҳукумати Ҷумҳурии Тоҷикистон таҳти роҳбарии хирадмандонаи Президенти Тоҷикистон муҳтарам Эмомалӣ Раҳмон тамоми имконоту фазои мусоиди илмомӯзӣ муҳайё аст, то мо аз он самаранок истифода намоем.

«Бистсолаи омӯзиш ва рушди фанҳои риёзӣ, дақиқ ва табиӣ дар соҳаи илму маориф» имкон медиҳад, ки сатҳу сифати таълимро баланд бардошта, шавқу рағбати ҷавононро ба омӯзиши ин фанҳо зиёд гардонем. Зеро таълими дурусти ин фанҳо ва рушди тафаккури техникӣ имкон медиҳад, ки зеҳни наврасону ҷавонони мо қавӣ гардида, онҳо баробар бо талаботи замона ва дигаргуниҳои имрӯзу фардо қадам гузоранд.

Дар конференсия инчунин оид ба 30 соли таъсиси кафедраи электротаъминкунии факултети энергетикии донишгоҳ, ки барои омода намудани кадрҳои муҳандисию техникӣ ва илмӣ-педагогӣ фаъолият мекунад, сухан гуфта шуд. Ҳоло хатмкардагони ин кафедра қариб дар тамоми соҳаҳои хоҷагии халқи ҷумҳурӣ фаъолияти пурсамар доранд.

Баъд аз анҷоми кори ҷаласаи пленарии конференсия кори он аз рӯи 6 бахш идома ёфта, дар он донишҷӯёну магистрантон, докторантон ва олимон маъруза намуданд.

АКС: Донишгоҳи техникии Тоҷикистон ба номи академик Муҳаммад Осимӣ