Вохӯрии роҳбарони агентиҳои авиатсияи граждании Тоҷикистон ва Қирғизистон баргузор гардид

ДУШАНБЕ, 15.04.2025 /АМИТ «Ховар»/. 15 апрел вохӯрии Директори Агентии авиатсияи граждании назди Ҳукумати Ҷумҳурии Тоҷикистон Ҳабибулло Назарзода бо Директори Агентии давлатии авиатсияи граждании назди Девони вазирони Ҷумҳурии Қирғизистон Данияр Бостонов ва Директори генералии КД «Қирғизаэронавигатсия» Торокелди Омуров баргузор гардид.

Дар мулоқот масъалаҳои зиёд намудани шумораи парвозҳо дар хатсайрҳои Душанбе – Бишкек – Душанбе ва Хуҷанд – Бишкек – Хуҷанд, кушодани хатсайрҳои нав ба самти Душанбе – Иссиқкӯл ва Хуҷанд – Иссиқкӯл, таҳкими ҳамкории дуҷониба дар самти таъмини бехатарии парвозҳо ва амнияти авиатсионӣ, инчунин рақобатпазир сохтани соҳаи авиатсияи гражданӣ мавриди баррасӣ қарор гирифтанд.

Баъд аз анҷоми мулоқот, бо мақсади баланд бардоштани сатҳи дониш ва малакаи касбии мутахассисони соҳаи авиатсияи гражданӣ, лоиҳаи «Ёддошти тафоҳум оид ба ҳамкорӣ байни Агентии авиатсияи граждании назди Ҳукумати Ҷумҳурии Тоҷикистон ва Агентии давлатии авиатсияи граждании назди Девони вазирони Ҷумҳурии Қирғизистон» ба имзо расид.

Бояд таъкид кард, ки баргузории чунин вохӯриҳо дар рушди соҳаи авиатсияи граждании мамлакат нақши муассир мегузорад.

АКС: Агентии авиатсияи граждании назди Ҳукумати Ҷумҳурии Тоҷикистон