Дар Хуҷанд байни духтарон мусобиқаи дӯстонаи футбол баргузор гардид

ДУШАНБЕ, 10.05.2025. /АМИТ «Ховар»/. Бахшида ба Рӯзи ҷавонон (23 май) ва Рӯзи ҷаҳонии футбол (25 май) бо ибтикори Кумитаи иҷроияи Ҳизби Халқии Демократии Тоҷикистон дар шаҳри Хуҷанд байни ҷавондухтарон  мусобиқаи дӯстонаи футбол баргузор гардид.

Тавре аз Ҳизби Халқии Демократии Тоҷикистон дар шаҳри Хуҷанд ба  АМИТ «Ховар» хабар доданд, мусобиқа бо мақсади ҷалби бештари ҷавонон, бахусус духтарон ба тарзи ҳаёти солим ва таҳкими арзишҳои дӯстию ҳамбастагӣ гузаронида шуд.

Дар мусобиқа шаш даста иштирок намуд. Тибқи натиҷаҳои ниҳоӣ, ҷойи якум ба дастаи «Пешвои мо — Ифтихори мо», ҷойи дуюм ба дастаи «Ҷавонон — пайравони Пешво» дода шуда, дастаи  «Ҷавонон — ояндасозони миллат» ғолиби ҷойи сеюм гардид.

Сиёсати давлати ҷавонон дар даврони соҳибистиқлолии мамлакат зери таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон қарор дорад. Он дар меҳвари сиёсати иҷтимоии Ҳукумати Ҷумҳурии Тоҷикистон мақоми хосса дорад.

АКС: Кумитаи иҷроияи Ҳизби Халқии Демократии Тоҷикистон дар шаҳри Хуҷанд