Дар қисматҳои баландкӯҳи ноҳияи Рашт кишти картошка идома дорад

РАШТ, 12.05.2025 /АМИТ «Ховар»/. То имрӯз дар хоҷагиҳои ноҳияи Рашт дар 1181  гектар картошка кишт карда шудааст. Дар сохтори кишоварзии ноҳияи Рашт дурнамои кишти картошка 1630 гектар буда, кишоварзони ноҳия  кӯшиш доранд, ки нақшаи кишти картошкаро сари вақт иҷро намоянд. Ҳамчунин сокинони ноҳияи Рашт барои самаранок истифода бурдани заминҳои наздиҳавлигӣ дар 1850 гектар замини наздиҳавлигӣ картошкаи барвақтӣ кишт намудаанд. Имрӯзҳо дар заминҳои хоҷагиҳои деҳқонӣ, воқеъ дар қисматҳои баландкӯҳи ноҳия кишти картошка идома дорад.

Тавре ба мухбири минтақавии АМИТ «Ховар» Субҳониддини Маҳмуд корманди шуъбаи кишоварзии ноҳияи Рашт иттилоъ дод, имсол 90 фоизи деҳқонони ноҳия навъҳои картошкаи “Тоҷикистон-24” ва “Покистон” кишт намудаанд. Чунки ин  навъи картошка ба муҳити ноҳия созгор буда, ҳосили фаровон медиҳад.

Вазорати кишоварзии Ҷумҳурии Тоҷикистон низ ба хоҷагиҳои деҳқонии ноҳия 50 тонна картошка кумак намуд.

Имсол 357 техника ва  механизми кишоварзӣ ба сари вақт кишт намудани картошка равона шудаанд.

 АКС: Мақомоти иҷроияи ҳокимияти давлатии ноҳияи Рашт