Кирмакпарварони шаҳри Турсунзода зиёда аз 3 тоннаю 800 килограмм пиллаи хушсифат истеҳсол намудаанд

ТУРСУНЗОДА, 29.05.2025. /АМИТ «Ховар»/.  Кирмакпарварӣ  соҳаи нозук буда, агар инсон ба он бо меҳру муҳаббати хосса машғул шавад, ҳосили фаровон ба даст оварда, шароити зиндагияшро хуб карда метавонад. Барои мисол, ман ҳамроҳи аҳли оилаам даҳ қуттӣ кирмак гирифтам,  ки имрӯзҳо ҳосили фаровони онро ҷамъоварӣ дорем. Ҷамъияти саҳомии кушодаи «Пиллаи тоҷик» дар шаҳри Турсунзода як килограмм пиллаи омехтаи истеҳсолшударо аз мо ба маблағи 20 сомонӣ харидорӣ менамояд. Чунин иброз дошт кирмакпарвар Алимардон Шоҳимардонов аз Ҷамоати деҳоти Қаратоғи шаҳри Турсунзода ба хабарнигори минтақавии АМИТ «Ховар» Субҳониддини Маҳмуд.

Тавре намояндаи Ҷамъияти саҳомии кушодаи «Пиллаи тоҷик» дар шаҳри Турсунзода   Рамазон Файзуллоев  иттилоъ дод,  дар шаҳри Турсунзода  дар асоси барномаи «Рушду тараққиёти соҳаи пиллапарварӣ ва коркарди он» ба 80 пиллапарвари ҷамоатҳои деҳоти шаҳр 200 қуттӣ кирмак дода шуд. Хушбахтона, парваришу нигоҳубини кирмак хуб буда, кирмакпарварон ҳосили нағз ба даст меоваранд.

Ҷамъияти саҳомии кушодаи «Пиллаи тоҷик» дар шаҳри Турсунзода  аз пиллапарварон як  килограмм пиллаи тари нав истеҳсолшударо ба маблағи 20 сомонӣ харидорӣ менамояд.

Кирмакпарварони шаҳри Турсунзода бо риоя намудани ҳамаи қоидаҳои агротехникии парвариш ва нигоҳубини кирмак  бояд истеҳсоли пилларо ба 6 тонна расонанд. Хушбахтона, то имрӯз зиёда аз 3 тоннаю 800 килограмм пиллаи хушсифат истеҳсол намудаанд.

Яке аз пиллапарварони соҳибтаҷрибаи шаҳр Муаззама Раҷабова мебошад, ки имсол аз се қуттӣ 110 кг пилла ҷамъоварӣ намуд.  Ӯ гуфт, ки «мо, пиллапарварон хурсандем, ки маҳсули дасти мо харидор дорад ва сари вақт маблағгузорӣ мешавад. Соҳаи пиллапарварӣ нисбат ба солҳои пешин хеле хуб шудааст. Ҳоло пиллапарварон тавассути меҳнати ҳалол фоидаи хуб ба даст оварда, зиндагиашонро пеш мебаранд».

АКС: Мақомоти иҷроияи ҳокимияти давлатии шаҳри Турсунзода