Таҳкими ҳамкории дуҷониба дар бахшҳои саноат ва воридоти технологияҳои нав бо намояндагони BVMW баррасӣ гардид

ДУШАНБЕ, 09.05.2025 /АМИТ «Ховар»/. Имконоти таҳкими ҳамкории дуҷониба дар бахшҳои саноат, воридоти технологияҳои нав, рушди соҳибкории хурду миёна ва таъсиси корхонаҳои муштарак дар мулоқоти Вазири саноат ва технологияҳои нави Ҷумҳурии Тоҷикистон Шералӣ Кабир бо ҳайати Иттиҳодияи соҳибкорони хурду миёнаи Олмон (BVMW) таҳти роҳбарии Андреас Яҳн дар шаҳри Душанбе баррасӣ гардид. Дар ин хусус АМИТ «Ховар» бо истинод ба Вазорати саноат ва технологияҳои нави ҷумҳурӣ иттилоъ медиҳад.

Вазири саноат ва технологияҳои нав имконияти сармоягузорӣ дар Тоҷикистон, аз ҷумла дар минтақаҳои озоди иқтисодӣ ва соҳаҳои афзалиятноки саноатиро муаррифӣ намуд.

Ҳайати BVMW барои густариши ҳамкории тиҷоратӣ ва воридоти таҷриба ва технологияи муосири олмонӣ ба Тоҷикистон изҳори омодагӣ намуд. Ҷонибҳо ҳамчунин зарурати баргузории ҳамоишҳо ва форумҳои муштараки соҳибкориро таъкид намуданд.

Вохӯрӣ дар фазои созанда баргузор шуда, ҳамчун қадами муҳим дар рушди робитаҳои иқтисодию саноатии Тоҷикистону Олмон арзёбӣ гардид.

АКС: Вазорати саноат ва технологияҳои нави Ҷумҳурии Тоҷикистон