АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд

ДУШАНБЕ, 05.06.2025 /АМИТ «Ховар»/. Имрӯз, 5 июн дар шаҳри Душанбе дар доираи ҷаласаи Шурои сарони ҳукуматҳои кишварҳои иштирокдори Иттиҳоди Давлатҳои Мустақил Ёддошти тафоҳуми ҳамкорӣ байни Агентии миллии иттилоотии Тоҷикистон «Ховар» ва Ҷамъияти саҳомии пӯшидаи «Ширкати байнидавлатии телевизион ва радиои «Мир»» оид ба ҳамкорӣ баъди имзо табодул карда шуд.

Санади мазкур аз ҷониби директори АМИТ «Ховар» Субҳиддин Шамсиддинзода ва Раиси ҶСП «Ширкати байнидавлатии телевизион ва радиои «Мир» Радик Батиршин имзо карда шуд.

Дар асоси ёддошти тафоҳум ҷонибҳо дар бахшҳои табодули маводи иттилоотӣ, пахши муштараки барномаҳо, иштирок дар чорабиниҳои соҳаи ВАО ва тарғиби маводи иттилоотӣ дар шабакаҳои интернетӣ ҳамкорӣ менамоянд.

Ин ташаббус дар доираи сиёсати иттилоотии Ҷумҳурии Тоҷикистон ҷиҳати таҳкими муносибатҳои байналмилалӣ ва рушди ҳамкории иттилоотӣ бо кишварҳои иштирокдори ИДМ амалӣ карда шуда, дар татбиқи ҳадафҳои стратегӣ ва муаррифии бештари Тоҷикистон дар фазои иттилоотии минтақавӣ ва байналмилалӣ нақши муҳим мегузорад.