Дар қароргоҳи ЮНЕСКО ба ифтихори 700-солагии Ҳофизи Шерозӣ намоиши ҷашнӣ ифтитоҳ гардид

ДУШАНБЕ,11.06.2025 /АМИТ «Ховар»/. Дар ҳошияи Конфронси байналмилалии илмӣ таҳти унвони «700 сол бо Ҳофиз» имрӯз дар қароргоҳи ЮНЕСКО дар шаҳри Парижи Фаронса ба ифтихори 700 – солагии Ҳофизи Шерозӣ намоиши ҷашнӣ ифтитоҳ гардид, иттилоъ медиҳад АМИТ «Ховар» бо истинод ба Оосрхонаи миллии Тоҷикистон.

Дар ифтитоҳи расмии намоиш Вазири фарҳанги Ҷумҳурии Тоҷикистон Матлубахон Сатториён ва муовини Дабири кулли ЮНЕСКО Лидия Брито роҷеъ ба мақому манзалат ва саҳми мондагори Хоҷа Ҳофизи Шерозӣ дар рушди адабиёти оламшумули тоҷику форс сухан намуданд.

Дар намоиш аз фонди тиллоии Осорхонаи миллии Тоҷикистон ва Маркази мероси хаттии Академияи миллии илмҳои Тоҷикистон нусхаҳои дастнавис ва китобҳои чопи сангии «Девон»- и Хоҷа Ҳофизи Шерозӣ, ки аҳамияти бузурги илмӣ ва таърихию фарҳангӣ доранд, пешниҳоди тамошобинон гардонида шуданд. Инчунин дар намоиш намунаҳои ҳунари хушнависӣ ва асарҳои санъати миниётурнигорӣ, ки аз ҷониби рассом-миниётурнигори тоҷик Олимҷон Комилзода дар асоси ғазалиёти Ҳофизи Шерозӣ тасвир гардиданд, ба маърази тамошо гузошта шуданд.

Дар баробари осори хаттӣ, инчунин дар намоиш намунаҳои гуногуни ҳунарҳои қадимаи миллӣ, ба монанди сӯзаниҳо, атласу адрас, мисгарӣ, кандакории рӯйи чӯб, кундал ва дигар мероси фарҳангӣ, ки бо ҳунари баланд омода гардидаанд ва муаррифи фарҳанги тоҷикон мебошанд, ба намоиш гузошта шуданд.

Бояд гуфт, ки ҳадафи намоиш муаррифии осори ҷаҳоншумули Хоҷа Ҳофизи Шерозӣ дар қалби Аврупо ва арҷгузорӣ ба ин шахсияти таърихӣ ва осори бебаҳои шоир мебошад.

АКС: Осорхонаи миллии Тоҷикистон