Дар баъзе аз хоҷагиҳои таҷрибавии шаҳри Ҳисор риоя нагардидани қоидаҳои агротехникаи парвариш мушоҳида мегардад

ДУШАНБЕ, 04.06.2025 /АМИТ «Ховар»/. Ҳайати кории Вазорати кишоварзӣ дар асоси дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон баҳри таъмини амнияти озуқавории мамлакат ба шаҳри Ҳисор сафар карда, бо вазъи риояи қоидаҳои агротехникаи парвариши ниҳолу зироат шинос шуд. Хайати мазкур ба кишоварзон баҳри рафъи камбудиҳои ҷойдошта тавсияҳои муфид дод, иттилоъ медиҳад хабарнигори минтақавии АМИТ «Ховар» Субҳониддини Маҳмуд.

Дар Ҷамоати деҳоти Ҳисор Хоҷагии таҷрибавии «Сумбула» фаъолият мекунад. Хоҷагии мазкур ба парвариши ниҳолҳои нодир ва қаламчаи ток, ки аз хориҷи мамлакат ворид карда мешаванд, машғул мебошад. Тибқи мушоҳидаҳо, баъзе аз ниҳолҳо хушк гардида, вазъи онҳо нигароникунанда мебошад.

Ҳамчунин зимни шиносоӣ ҳайати кории Вазорати кишоварзӣ муайян намуд, ки роҳбарияти хоҷагӣ нисбат ба парвариши ниҳолҳо фориғболӣ намуда, қисме аз онҳо хушк шудаанд. Дар ҳоле, ки хоҷагиҳои фаъолияташон таҳти назорати олимон қарор дошта, бояд намунаи ибрат бошанд.

Ҳамчунин дар шаҳри Ҳисор хоҷагии чорводории «Зироаткорӣ» ва хоҷагии таҷрибавии «Зарнисор» фаъолият мекунанд. Онҳо ба павариши зироати полезӣ ва боғи интенсивӣ машғул мебошанд. Аммо дар баъзе аз онҳо риоя нагардидани қоидаҳои агротехникаи парвариши ниҳолу зироат мушоҳида мегардад.

Вобаста ба ҳолатҳои нигаронкунандаи корҳои кишоварзӣ аз ҷониби олимони соҳаи кишоварзӣ ба хоҷагидорон тавсияҳо дода шуд.

АКС: Мақомоти иҷроияи ҳокимияти давлатии шаҳри Ҳисор