Дар Маҷлиси намояндагон фраксияҳои ҳизбӣ таъсис дода шуд

ДУШАНБЕ, 04.06.2025. /АМИТ «Ховар»/. Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода ҷаласаи навбатии иҷлосияи якуми Маҷлиси намояндагони Маҷлиси Олии Ҷумҳурии Тоҷикистон,  даъвати ҳафтум баргузор гардид.  Дар ҷаласа масъалаи  таъсиси фраксияҳои ҳизбӣ мавриди баррасии  вакилон  қарор  дода шуд. Дар ин хусус ба АМИТ «Ховар» аз Маҷлиси намояндагон хабар доданд.

Масълаҳои таъсиси фраксияҳои ҳизбӣ ва гурӯҳи вакилони ғайриҳизбӣ дар Маҷлиси намояндагонро Раиси Комиссия оид ба назорати дастур ва ташкили кор Шуҳрат Ғанизода муаррифӣ намуда, ин фраксияҳоро аз лиҳози қонунӣ ва санадҳои меъёрию ҳуқуқӣ асоснок хонд.

Шуҳрат Ғанизода таъкид намуд, ки «дар асоси моддаҳои 52 ва 53 Қонуни конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон» ва бандҳои 105-119 Дастури Маҷлиси намояндагони Маҷлиси Олии Ҷумҳурии Тоҷикистон ва дигар асноди меъёрии ҳуқуқӣ вакилони Маҷлиси намояндагон барои изҳори дастаҷамъонаи ақидаҳои сиёсии худ, амалӣ гардонидани барномаҳо ва ҳадафҳои пешазинтихоботӣ,  ҳуқуқ доранд дар фраксияву гурӯҳҳо муттаҳид шаванд.

Дар иҷлосия аз ҷониби вакилони Маҷлиси намояндагон лоиҳаи қарорҳо оид ба таъсиси фраксияҳои ҳизбӣ ва гурӯҳи вакилони ғайриҳизбӣ ба тасвиб расид.

Таъкид гардид, ки  амалӣ  гардидани институти фаъолияти фраксияҳои ҳизбӣ ва гурӯҳҳои вакилон дар Маҷлиси намояндагони Маҷлиси Олии Ҷумҳурии Тоҷикистон ба плюриализми сиёсӣ ва гуногунандешӣ шароит фароҳам оварда, нишонаи боэътимоди демократияи солим аст.

АКС: Маҷлиси намояндагони Маҷлиси Олии Ҷумҳурии Тоҷикистон