Дар Маркази тадқиқоти стратегӣ масъалаи рушди соҳибкорӣ ва бахши хусусиро баррасӣ намуданд

ДУШАНБЕ, 20.06.2025 /АМИТ «Ховар»/. 18 июни соли равон дар Маркази тадқиқоти стратегии назди Президенти Ҷумҳурии Тоҷикистон Конфронси илмӣ-амалӣ дар мавзӯи «Рушди соҳибкорӣ ва бахши хусусӣ — омили муҳимми ноил гардидан ба ҳадафҳои стратегии рушди Ҷумҳурии Тоҷикистон» баргузор шуд, ки дар он масъалаҳои рушди фаъолияти соҳибкорӣ ва бахши хусусӣ, инчунин дарёфти роҳҳои ҳалли дигар мушкилоти ҷойдошта дар ин самт мавриди баррасӣ қарор дода шуд. Дар ин хусус ба АМИТ «Ховар» аз Маркази тадқиқоти стратегӣ хабар доданд.

Муовини якуми директори Маркази тадқиқоти стратегӣ Ораз Муртазозода изҳор дошт, ки соҳибкорӣ ва рушди бахши хусусӣ бо дарназардошти нақши муҳим доштанашон дар ҳалли масъалаҳои иқтисодию иҷтимоии мамлакат ва ғанӣ гардонидани буҷети давлатӣ яке аз самтҳои афзалиятноки сиёсати иқтисодии мамлакат муайян гардидааст.

— Аз ин лиҳоз, Ҳукумати Ҷумҳурии Тоҷикистон ба рушди бахши хусусӣ, соҳибкорӣ ва беҳтар намудани фазои сармоягузорӣ дар мамлакат таваҷҷуҳи хос зоҳир менамояд ва ташаббускори ҳалли масъалаҳои марбут ба дастгирии соҳибкорӣ мебошад, -афзуд Ораз Муртазозода.

Дар конфронс таъкид гардид, ки Ҳукумати Ҷумҳурии Тоҷикистон рушди бахши хусусӣ ва соҳибкорию сармоягузориро дар санадҳои муҳимми стратегии мамлакат, аз ҷумла, «Стратегияи миллии рушди Ҷумҳурии Тоҷикистон барои давраи то соли 2030» яке аз воситаҳои асосии таъмини ҳадафҳои гузошташуда муайян намудааст, ки ин далели возеҳу равшани аҳаммияти бахши хусусӣ барои таъмини рушди устувори иқтисоди миллӣ мебошад.

«Дар шароити имрӯза таъмини рушди фаъолияти соҳибкории истеҳсолӣ дар баробари ҳалли дигар масъалаҳо аз бисёр ҷиҳат ба дастрасӣ ва таъмини субъектҳои соҳибкорӣ бо захираҳои қарзию моливии имтиёзнок вобаста мебошад. Тибқи оморӣ расмӣ, соли 2024 ҳаҷми пешниҳоди қарз ба рушди соҳибкории истеҳсолӣ дар мамлакат 7,6 млрд сомониро ташкил намуда, нисбат ба соли 2020 тақрибан ду баробар зиёд мебошад. Бо вуҷуди он, ки дар ин давра ҳаҷми пешниҳоди қарз беш аз 27,6 млрд сомониро ташкил намуда бошад ҳам, ин нишондиҳанда барои расидан ба ҳадафҳои гузошташуда ва захираю имкониятҳои мавҷуда ҳанӯз қонеъкунанда нест»,- тазаккур дод Ораз Муртазозода.

Дар ҳамоиш иброз карда шуд, ки таъмини рушди босуботи фаъолияти соҳибкории истеҳсолӣ бевосита ба бастаи имтиёзу сабукиҳои гуногуни иқтисодиву маъмурӣ алоқаман аст. Бинобар ин, таъмини сатҳи бархӯрдории субъектҳои соҳибкорӣ аз имтиёзу сабукиҳои андозию гумрукӣ ва қарзиву молиявии дар қонунгузории амалкунанда пешбинигардида, инчунин, таъмини бархӯрдории онҳо аз мораторияҳои эълонгардида ба санҷиши субъектҳои фаъолияти соҳибкорӣ, аз ҷумлаи масъалаҳои муҳим ба ҳисоб меравад.

Тибқи маълумот, ҳоло дар қонунгузории амалкунанда ҷиҳати таъмини рушди соҳибкорӣ, аз ҷумла соҳибкории истеҳсолӣ беш аз 120 номгӯйи имтиёзу сабукиҳо, пешбинӣ гардида, аз он 85 фоизашро имтиёзҳои фискалӣ ташкил медиҳад.

АКС: Маркази тадқиқоти стратегии назди Президенти Ҷумҳурии Тоҷикистон