Дар назди мактабҳои ноҳияи Рӯдакӣ биноҳои иловагӣ сохта мешаванд

ДУШАНБЕ, 12.06.2025 /АМИТ «Ховар»/. Ба ифтихори ҷашни 35-солагии Истиқлоли давлатӣ ва бо мақсади  беҳтар намудани шароити таълиму тарбияи хонандагон  дар деҳаи Роҳатии Ҷамоати деҳоти Роҳатии ноҳияи Рӯдакӣ дар назди муассисаи таълимӣ   бинои иловагӣ  сохта,  ба истифода дода мешавад. Дар ин хусус  ба хабарнигори минтақавии АМИТ «Ховар» аз Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Бинои иловагии муассисаи таълимии деҳаи Роҳатӣ барои 640 нафар хонанда дар як баст пешбинӣ гардида, аз се ошёна иборат мебошад. Он бо дастгирии Мақомоти иҷроияи ҳокимияти давлатии ноҳияи Рӯдакӣ  ва бо саҳми соҳибкорони маҳаллӣ  бунёд мегардад.

Бунёди ин ва дигар иншооти муҳимми иҷтимоӣ нишонаи дастгирии пайвастаи роҳбарияти давлату Ҳукумат дар  соҳаи маориф ва талошҳо баҳри фароҳам овардани шароити арзандаи таълим барои наврасону ҷавонон мебошад.

Ҳамчунин дар деҳаи Доваи Ҷамоати деҳоти Роҳатӣ, дар   назди Муассисаи таълимии рақами 110 сохтмони бинои иловагӣ оғоз гардид, ки баъди  ба истифода додани  он  мушкилоти норасоии ҷойи нишасти муассиса бартараф мегардад.

Бояд афзуд, ки барои рушди дилхоҳ давлат  маориф соҳаи калидӣ маҳсуб мешавад. Ин соҳа заминаи асосию боэътимоди давлат барои инкишофи ҳама соҳаҳои хоҷагии халқ мебошад. Аз ин рӯ, дар раванди сиёсати давлатӣ соҳаи маориф ҳамчун соҳаи афзалиятноки сиёсати давлатӣ эътироф гардидааст. Аз ин ҷост, ки  илму маориф ва тарбияи насли босаводу худшинос дар маркази диққати Президенти Ҷумҳурии Тоҷикистон муҳтарам Эмомалӣ Раҳмон қарор дорад.

 АКС: Мақомоти иҷроияи ҳокимияти давлатии ноҳияи Рӯдакӣ