Дар ноҳияҳои Рашту Тоҷикобод «Маркази ҷавонон» ва майдончаҳои варзишӣ бунёд карда мешаванд

ДУШАНБЕ, 07.06.2025. /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Мақомоти иҷроияи ҳокимияти давлатии ноҳияи Рашт дар ҳамкорӣ бо соҳибкорону шахсони ташаббускор корҳои сохтмонии «Маркази ҷавонон»-и ноҳияи Рашт оғоз гардид. Дар ин хусус ба АМИТ «Ховар» аз Кумитаи кор бо ҷавонон ва варзиш хабар доданд.

Ин марказ дар ҳошияи дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон ҷиҳати фароҳам овардани имконияту шароити мусоид барои наврасону ҷавонон бунёд мегардад.

Ҳамзамон бо пайравӣ аз сиёсати созандаи Пешвои миллат, Кумитаи кор бо ҷавонон ва варзиш дар якҷоягӣ бо ҷавонони фаъолу ташаббускори ноҳияҳои Рашт ва Тоҷикобод тасмим гирифтаанд, ки дар баробари бунёди хонаҳои нави истиқоматӣ ба оилаҳои аз офати табиӣ зарардидаи ин минтақаҳои баландкӯҳ, чор майдончаи муосири варзиширо навсозӣ намуда, дар арафаи таҷлили Рӯзи Истиқлолияти давлатӣ ба истифода диҳанд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон