Дар Суғд беш аз 75 ҳазор нафар кӯдакону наврасон ба истироҳат фаро гирифта мешаванд
ДУШАНБЕ, 30.06.2025 /АМИТ «Ховар»/. Дар вилояти Суғд соли равон беш аз 75 ҳазор кӯдакону наврасон ба истироҳат фаро гирифта мешаванд. Бо ин мақсад 10 истироҳатгоҳи беруназшаҳрӣ, 741 рӯзонаи наздимактабӣ, 103 истироҳатию меҳнатӣ ва 102 варзишию беҳдоштӣ фаъолият доранд. Дар ин хусус ба АМИТ «Ховар» аз хадамоти матбуоти Раиси вилояти Суғд хабар доданд.
Бо фаро расидани мавсими гармӣ ва оғози таътили тобистона дар муассисаҳои таълимии вилояти Суғд тамоми тадбирҳои зарурӣ андешида шуда, барои истироҳату фароғати хонандагон шароити мусоид фароҳам оварда шудааст. Имсол низ садҳо истироҳатгоҳҳои наздимактабӣ ва беруназшаҳрӣ фаъол гардида, ҳазорҳо нафар хонандагони муассисаҳои таълимӣ ба истироҳат ҷалб карда мешаванд.
Бо дастгирии мақомоти иҷроияи ҳокимияти давлатии вилоят, инчунин кӯдакони ятиму бепарастор, хонандагони аълохон, ғолибони озмуну олимпиадаҳои сатҳи маҳалливу ҷумҳуриявӣ ва байналмилалӣ бо роҳхатҳои ройгон ба истироҳат фаро гирифта мешаванд.
Яке аз калонтарин марказҳои истироҳатию солимгардонии вилояти Суғд, ин лагери «20-солагии Истиқлолият» мебошад. Истироҳатгоҳ дорои 6 бинои хобу фароғат, ошхона, толори кино, маҷлисгоҳ, синфхонаҳои машғулиятгузаронӣ, майдончаҳои варзишӣ ва 3 ҳавзи шиноварӣ буда, имкони дар як баст қабул намудани то 360 нафар хонандаро дорад.
Айни замон дар лагер беш аз 10 мураббӣ бо наврасон кор бурда, 15 маҳфили гуногун — аз қабили рассомӣ, китобхонӣ, забономӯзӣ, компютер, ҳунарҳои мардумӣ, варзиш ва ғайра фаъолият доранд. Хонандагон тибқи шавқу завқи худ ба ин ё он маҳфил ҷалб шуда, дар озмуну мусобиқаҳои варзишӣ ва зеҳнӣ иштирок мекунанд.
АКС: Хадамоти матбуоти Раиси вилояти Суғд
Дар Филиали Донишгоҳи давлатии Москва дар шаҳри Душанбе ду маркази нави илмӣ ба фаъолият оғоз менамояд
Дар муассисаҳои таҳсилоти олии вилояти Ивановои Федератсияи Русия зиёда аз 600 шаҳрванди Тоҷикистон таҳсил менамоянд
Имрӯз дар ноҳияҳои кӯҳии Тоҷикистон ҳаво то 27 дараҷа гарм мешавад
Имрӯз дар Филиали Донишкадаи энергетикии Москва дар шаҳри Душанбе нишасти матбуотӣ доир мегардад
Филиали Донишгоҳи миллии таҳқиқотии технологӣ «МИСИС»-ро 127 донишҷӯ хатм намуд
Тоҷикистон ва Ҷопон ҳамкориро дар соҳаи энергетика ва захираҳои об густариш медиҳанд
15 хатмкунандаи Филиали Донишкадаи рушди менеҷменти Сингапур тибқи стандартҳои таълимии Британияи Кабир соҳиби дараҷаҳои магистрӣ шуданд
ПАНҶСОЛАИ РУШДИ САНОАТ. Дар ноҳияи Рашт 10 коргоҳи истеҳсолию корхонаи саноатӣ ба истифода дода мешавад
Ғолибони даври дуюми Озмуни ҷумҳуриявии «Тоҷикистон — Ватани азизи ман» муайян гардиданд
Бонки миллии Тоҷикистон аз паҳн гардидани боз як навъи қаллобӣ ҳушдор медиҳад
Дар Бохтар оид ба кам кардани талафоти неруи барқ ҷаласа доир гардид
