Дар Турсунзода Фестивали саводнокии молиявӣ баргузор шуд

ДУШАНБЕ, 26.06.2025 /АМИТ «Ховар»/. Бо ташаббуси Бонки миллии Тоҷикистон дар ҳамкорӣ бо ташкилоти қарзии молиявӣ, ташкилоти суғуртавӣ ва шарикони рушд дар шаҳри Турсунзода фестивали навбатии саводнокии молиявӣ баргузор шуд, иттилоъ медиҳад АМИТ «Ховар» бо истинод ба Бонки миллии Тоҷикистон.

Дар Фестивали молиявӣ муовини раиси Бонки миллии Тоҷикистон Далер Муродализода ва Раиси шаҳри Турсунзода Парвиз Акрамзода оид ба аҳаммияти маърифати молиявӣ, зарурати саводнокии молиявии аҳолӣ ва нақши он дар рушди иқтисоди мамлакат сухан намуданд.

Иброз гардид, ки баргузории фестивалҳои саводнокии молиявӣ на танҳо чорабинии омӯзишӣ, балки имкони мусоид барои муошират бо коршиносон, мубодилаи таҷриба ва шиносоӣ бо воситаҳои нави молиявӣ мебошад.

Дар қисмати аввали фестивал мутахассисони Бонки миллии Тоҷикистон, ташкилотҳои суғуртавӣ ва низомҳои пардохту интиқол дар мавзуъҳои гуногун, аз ҷумла «Рушди бонкдории исломӣ дар Тоҷикистон», «Пешгирии амалҳои қаллобони молиявӣ», «Нақши ташкилотҳои молиявӣ дар баланд бардоштани сатҳи саводнокии молиявии аҳолӣ», «Аҳаммияти ҳисоббаробаркуниҳои ғайринақдӣ» ва «Дурнамои рақамикунонии низоми суғурта дар Ҷумҳурии Тоҷикистон» маъруза карда, иштирокдоронро бо таҷрибаи муосири соҳа шинос намуданд.

Ҳамзамон дар рафти чорабинӣ озмуни саволу ҷавоб доир гардида, иштирокдорони фаъол бо туҳфаҳои хотиравӣ қадрдонӣ шуданд.

Инчунин дар қисмати дуюми чорабинӣ намоиши маҳсулоти ташкилотҳои молиявӣ ва суғуртавии ҷумҳурӣ ташкил карда шуда, дар он ташкилотҳои қарзии молиявӣ ва суғурта ба тамошобинони фестивал маҳсулоти худро муаррифӣ намуданд.

Дар қисми ҷамъбастӣ барномаи фарҳангии рангоранг бо ширкати ҳунармандони маъруфи ҷумҳурӣ баргузор гардида, озмуни бурди туҳфаҳо дар асоси саволу ҷавоб доир ба донишҳои молиявӣ фазои чорабиниро барои иштирокдорон боз ҳам идона намуд.

Фестивалҳои саводнокии молиявӣ дар доираи «Стратегияи миллии фарогирии молиявии Ҷумҳурии Тоҷикистон барои солҳои 2022–2026» гузаронида шуда, ҳадафаш баланд бардоштани сатҳи маърифати молиявии аҳолӣ, тавсеаи дастрасӣ ба хизматрасониҳои молиявию суғуртавӣ ва ба ин васила шиносоӣ бо хизматрасониҳои молиявӣ, суғуртавӣ ва пешниҳоди хизматрасонӣ мебошад.

АКС: Бонки миллии Тоҷикистон