Губернатори Ҳукумати мардумии музофоти Шэнсии Чин бо фаъолияти Минтақаи озоди иқтисодии «Данғара» шинос шуд

ДУШАНБЕ, 07.06.2025. /АМИТ «Ховар»/. Губернатори Ҳукумати мардумии музофоти Шэнсии Ҷумҳурии Мардумии Чин Ҷао Ган бо фазои сармоягузорӣ ва имконияти истеҳсолии Минтақаи озоди иқтисодии «Данғара» шинос шуд. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Данғара хабар доданд.

Зимни шиносоӣ доир ба самтҳои афзалиятноки фаъолияти минтақа, инфрасохтори муҳайёшуда, имтиёзҳои сармоягузорӣ, инчунин чорабиниҳои дастгирии давлатӣ ба соҳибкорон маълумоти муфассал пешниҳод карда шуд.

Меҳмонон бо раванди истеҳсолӣ, иқтидори технологӣ ва дурнамои рушди як қатор корхонаҳои чинӣ, ки дар Минтақаи озоди иқтисодии «Данғара» фаъолият доранд, шинос шуданд.

Дар мулоқот бо роҳбарияти Минтақаи озоди иқтисодии «Данғара» ҷонибҳо дурнамои ҳамкориро дар самтҳои рушди саноат, бахши сохтмон, коркарди масолеҳи сохтмонӣ ва таъсиси корхонаҳои нави муштарак мавриди муҳокима қарор доданд.

Маъмурияти Минтақаи озоди иқтисодии «Данғара» барои густариши минбаъдаи ҳамкории иқтисодӣ, татбиқи лоиҳаҳои нав ва фароҳам овардани шароити мусоиди сармоягузорӣ изҳори омодагӣ намуд.

АКС: Мақомоти иҷроияи ҳокимияти давлатии ноҳияи Данғара