Имсол кишоварзони ноҳияи Восеъ ҳосили фаровон ба даст оварданд

ДУШАНБЕ, 21.06.2025. /АМИТ «Ховар»/. Кишоварзони  ноҳияи Восеъ имсол дар натиҷаи  истифодаи оқилонаи заминҳои кишоварзӣ ҳосили фаровон ба даст оварда, имрӯзҳо  баҳри беталаф  ҷамъоварии маҳсулот тадбирҳои муҳим меандешанд. Онҳо нақша доранд, ки баъд аз ҷамъоварии ҳосили аввал дар заминҳо кишти такрорӣ гузаронанд. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Дар Ҷамоати деҳоти Тугараки ноҳия ҷамъоварии ҳосили пиёз, картошка ва сабзӣ ҷараён дорад.  Дар хоҷагии деҳқонии «Ҳоҷӣ Партов»-и  ин ҷамоат 4 гектар гандум, 50 садяк пиёз, 50 садяк картошка ва 13 гектар пахта кишт гардидааст. Хоҷагидорон аз фаровонии ҳосил хабар дода, тасмим гирифтаанд, ки баъди холӣ шудани замин, дар он дубора маҳсулот кишт намоянд.

Дар хоҷагии деҳқонии «Сино-2010»-и Ҷамоати деҳоти ба номи Абдӣ Авазови ноҳия дар 14 гектар пахта, 2 гектар помидор, 1 гектар сирпиёз кишт намуда, дар 3 гектар кишти такрорӣ гузаронида шудааст.

Ба гуфтаи мутахассисон, нашъунамои пахта хуб буда, гузаронидани саривақтии корҳои агротехникӣ ва коркарди байниқаторӣ заминаи хубро барои нашъунамо фароҳам овардааст. Хоҷаги ҳамасола бо бардоштани ҳосили фаровон дар таъмини бозори дохилии мамлакат бо маҳсулоти кишоварзӣ нақши назаррас дорад.

Заҳматкашонли хоҷагии деҳқонии «Абдуҷаббор»-и Ҷамоати деҳоти Миралиобод бо истифодаи мақсадноки  замин ва гирифтани ду-се ҳосил аз он,  эҳтиёҷоти сокинонро қонеъ гардонида,  аз ҳисоби фоидаи аз фурӯш ба дастомадаашон шароити зисти худро беҳтар месозанд.

Хоҷагӣ дорои 34 гектар замин буда, дар 10 гектар замини он моҳипарварӣ, 7 гектар боғи интенсивии ангур, 3 гектар арчазор, 15 садяк гармхона ва 2 гектар пахтаро ба роҳ монда шудааст.

АКС: Хадамоти матбуоти Раиси вилояти Хатлон